'Joker 2' an siam dawn em ni?

Kum 2019-a tlangzarh DC Film 'Joker' chhunzawmna siam tumin tunah hian hmalakna a awm leh ṭan nia sawi niin director Todd Phillips chuan script a buaipui ṭan leh tawh niin khawthlang media ṭhenkhat chuan an tarlang.

Entertainment media hrang hrangin hemi chungchang hi tarlang mah se Warner Bros lam chuan thuchhuah engmah an la nei lo. Hetihlai hian fan tam tak chuan Joker 2 hi siam ṭul an tih loh thu an auchhuahpui ve mek bawk.

Director Todd Phillips chuan a hmain Joker chhunzawmna siam tumna a awm loh thu a lo sawi tawh a, hetihlai hian tunhnaiah chhunzawmna siam tum thawm hi a rawn ri hluia a, report ṭhenkhatah phei chuan kum 2019 aṭang khan hmalakna a awm leh ṭan nghal nitein an tarlang hial.

Joker film hi kum 2019-a tlangzarh a nih khan a hit rem rem hle a, $maktaduai 55-70 inkar vel senga an siam niin $tlukledingawm 1.074 lai Box Office aṭangin a lalut a ni. Tlangzarh a nih kumah khan film sum lalut tam parukna niin, Oscar award pawh a dawng hial a ni.

Thuchhuah an siam hmasakah chuan Warner Bros. lam chuan chhunzawmna siam an tum loh thu lo sawi tawh mah se kum 2019 kum tawp lamah khan achangtupa ber Joaquin Phoenix chuan a chhunzawmna siam a chak thu a lo sawi lang zeuh tawh thung.

The Hollywood Reporter chuan may 5 khan Joker chhunzawmna siam a ni dawn tih hi a lo sawi chiang tawh a, May 27 khan Todd Phillips pawhin a chhunzawmna siam turin inremna a ziak leh tawh nia tarlan a ni bawk. Dik tak maw!?