Box Office : A Quiet Place Part II a bengchheng ber

Kar hmasa khan US-ah chuan film lian pahnih 'A Quiet Place Part II' leh 'Cruella'-te tlangzarh a ni a, thawm an nei ring dun a, sum pawh an lalut hnem dun hle. 'A Quiet Place Part II' sum lakluh erawh a tam zawk hle a, hrilen hnua tlangzarh kara film sum lalut tam ber record a siam nghal der mai!

Godzilla leh Kong aia hrâm ring Quiet Place 2
Emily Blunt leh a pasal John Krasinski-te chan dunna 'A Quiet Place' chhunzawmna 'A Quiet Place Part II' chu Zirtawpni liam taah khan US-ah tlangzarh a ni a, thawm a nei ring nghal rem rem hle a, kar tawp liam taah khan $57,000,000 lai sum a lalut.

'A Quiet Place Part II' hi theatre 3,726-ah pek chhuah niin ram dang aṭanga a sum lakluh $22,000,000 nen $79,000,000 lai sum a lalut tawh a ni.

'Godzilla Vs Kong'-in pandemic record a lo siam tawh chu North America lamah chuan 'A Quiet Place Part II' hian a khum der bawk. 'Godzilla VS Kong' kha film dang ang lo takin Zirtawpniah tlangzarh a ni lo a, Nilainiah tlangzarh niin tlangzarh a nih aṭanga ni nga chhungin $mtd 48.5 lai sum a lalut a, hrilen hnua North America Box Office-a tlangzarh kara sum lalut tam ber record a siam. Chu record chu 'A Quiet Place Part II' hian ni thum chhung lekin a rawn khum thung.

He film hi nikum March thlaa tlangzarh an tum tawh kha a ni a, film dang ang bawkin hrileng vangin tlangzarh hun hi kum khat chuangin an sawn hla a ni. Film siamna atan hian $mtd 61 vel an seng nia tarlan niin tunah hian an budget chu an khum der tawh.

John Krasinski chuan he film hi direct-in Millicent Simmonds leh Noah Jupe-te an inlan leh bakah Cillian Murphy pawh a inlan bawk.

'A Quiet Place Part II' hi critics lam chuan an fak tlangpui a, Rotten Tomatoes-ah chuan mi 211 laiin review-in chung zinga 91% chuan a fak a, rating pawh 7.5/10 lai a hmu a ni.

Achangtunu ber Emily Blunt chuan a chhunzawmna siam leh turin Krasinski chuan 'idea' a nei tih thla hmasa khan a lo sawi zeuh tawh bawk a, a hlawhtling leh bawk nen chhunzawmna kan hmu leh mai thei.

Cruella ve thung
'The Hundred and One Dalmatians' spinoff 'Cruella' pawh Zirtawpni liam taah khan tlangzarh a ni ta a, 'A Quiet Place Part II' ang em emin Box Office-ah sum lalut tam lo mah se $26,500,000 lai chu sum a lalut tho.

Emma Stone channa 'Cruella' hi Disney+ lamah stream theiha dah chhuah a ni bawk a, critics lam pawhin an fak tlangpui a, Rotten Tomatoes-ah chuan review 274 aṭangin rating 6.60/10 a hmu a ni.

US pawn lam aṭangin $16,100,000 lai sum a lalut tawh bawk a, chu nen chuan tun kar tawp chhung khan $42,600,000 a lalut a ni.

Chart-a che ṭha zual dangte chu...
Chart hmasa lama pakhatna 'Spiral' chu pathumna a ni a, theatre 2,641 aṭangin $2,209,00 a lalut. 'A Quiet Place Part II' sum lakluh a tam fal hle a, chuti chung chuan 'Cruella' leh 'Spiral' sum lakluh zat pawh a la inthlau viau a ni.

Jason Statham channa 'Wrath of Man' chu palina a ni a, 'Raya and the Last Dragon' chu pangana a la ni phak bawk. Pathumna aṭanga panganate hi an sum lakluh a inthlau lo hle.