Modern-Era-a vinyl album album hralh kal ber Taylor Swift ‘Evermore’

Taylor Swift ‘Evermore’ vinyl album chuan record thar a siam a, kum 1991-a MRC Data-in electronic tracking sales a ṭan hnua vinyl album hralh tam ber a ni.

Swift hian a ‘Evermore’ album vinyl edition hi Zitawpni liam ta, May 28 khan a tlangzarh a, ni thum chhung lekin copy 40,000 a hralh hman. Kum 2014-a Jack White-in 'Lazaretto' hmanga record a lo siam tawh chu a khum.

‘Evermore’ album pangngai hi Nikum December 11 khan tlangzarh a ni tawh a, mahse vinyl edition hi chu Zirtawpni liam taah khan a chhawp chhuak chauh a ni. A album pangngai a tlangzarh aṭanga thla nga lai a liam hnuah he album hi tlangzarh chauh mah se a fan-te chuan an lo la hlut hle tho tih a hriat a ni.

Jack White ‘Lazaretto’ vinyl edition kha kar khat chhungin copy 40,000 tihral a ni a, he record hi Swift chuan ni thum chhungin a rawn nihrual der. White hmaa record lo siam tawhtu chu Pearl Jam niin kum 1994-a an tlangzarh ‘Vitalogy’kha kar khat chhungin copy 34,000 a hralh.

Taylor Swift ‘Evermore’ album hi a studio album pariatna a ni a, a album pangngai hmang khan record ropui tak a lo siam tawh bawk. Billboard 200 chart topper a nihpui chiah khan US history a hmeichhia, a zawna no.1 album pariat nei thei awmchhun a ni a, hmeichhe artist, no.1 debut album a zawna nei rang ber Guinness World Record a siam bawk.