Spider-Man ram zauhna tur thâwm a ri ret ret

Spider-Man fan-te tan thu lawmawm hriat tur a awm e. Sony exec. Sanford Panitch chuan Tom Holland-a MCU Spider-Man film leh an a spinoff film-te chu intawn tir an tum deuh niin a sawi thawi tlat mai.

90's-ah khan Marvel chuan Spider-Man leh a khawvel neitu nihna chu Sony Pictures hnenah a lo hralh tawh a, mahse kum 2014-khan inremna thar siamin MCU-ah Spider-Man chu a rawn uai lut a nih kha. Mahse heti chung hian Sony chuan 'Sony Pictures Universe of Marvel Characters' (SPUMC) tia sawiin Spider-Man spinoff- Venom leh Morbius-te an siam tawh a ni.

Sony Pictures Motion Picture Group President, Sanford Panitch chuan Variety hnenah MCU leh SPUMC thlunzawmna turin ruahmanna a awm deuh tih a lo sawi thawi tawh bawk.

Heng zawng zawng hi chiang takin 'A thleng dawn e' tih la awm lo mah se, mi tam takin an nghahhlelh angin Spider-Man, Venom leh Morbius-te chu an la intawk khawm mai thei a ni. Tunah hian Kraven the Hunter thawm a ri ṭan leh mek bawk a, Spider-man leh a chhehvel chanchin hi a ngaihnawm chho ṭan dawn riau niin a lang.