Guns N' Roses-in 'live'-a an la play ngai miah lo hla 4 chu...

Hard Rock legend Guns N' Roses chuan tunhnai khan kumina Norh America tour an neih hun tur an puangzar a, chutih mek lai chuan online rock magazine Loudwire lam chuan live-a an hla sak hrang hrangte lo zirchiangin hla pali an la sak ngai miah lohte chu Thawhlehni khan an tarlang a ni.

GnR hi khawvela rock band lar ber pawl mah ni se album an tichhuak tam em em lo a, stuido album paruk chiah an tichhuak a ni. Kum 1991-a an tlangzarh Use Your Illusion 1-a mi 'Don't Damn Me' chu vawi khat mah Live-in an la sa miah lo niin Loudwire chuan an tarlang tlat mai. He album hi an hla hit ber ber- 'November Rain' leh 'Don't Cry' tih vel awmna kha a ni nghe nghe.

'Don't Damn Me' bak hla dang pathum an la sak ngai miah lohte hi chu 'Use Your Illusion II' album-a mi vek kha a ni thung. 'Get in the Ring', 'Shotgun Blues' leh 'My World'-te kha an concert set-list-ah a lo la tel ngai reng reng lo nia tarlan a ni tlat.

Heng hla pali kan sawilan ni lo zawng hi chu vawi khat tal chu mipui hmaah an lo play vek tawh thung a ni.

Kum 2018-a Not in This Lifetime tour an neihah khan an set-list hrut rualin hla 30 vel a awm a, Use Your Illusion album pahnih tihlarna atana tour an neih hunlai vel khan an set-list-ah hla 20 vel a awm tlangpui thung.

Hetihlai hian 'Welcome to the Jungle' chu an hla play tam ber a ni thung a, 'Appetite for Destruction' album-a hlate kha an play tam ber ber an nih bakah 'Knockin' on Heaven's Door,' 'Live and Let Die,' 'November Rain' leh 'You Could Be Mine'-te chu an hla play tam zual a ni bawk.

GnR-in live-a an la play ngai lo hlate chu:-
- 'Don't Damn Me'
- 'Get in the Ring'
- 'Shotgun Blues'
- 'My World'