Chutichuan... John Mayer 'Sob Rock' hun a inṭan ta e

John Mayer chuan hun eng emaw chen rimawi thar a tihchhuah tawh loh hnuah nimin khan a album thar Sob Rock-a mi tur single thar 'Last Train Home' a tichhuak.

'Gravity' hitmaker hi social media lamah hmuh tur tam hle mah se rimawi thar erawh a tichhuak lo rei tawh hle. Kum 2017-a 'The Search For Everything' album a tlangzarh hnuah khan album dang a la tlangzarh leh lo a, chumi a nih avang chuan nimina hla thar a tichhuak hi a fan-te pawhin an lawm hle.

Mayer hian 'Last Train Home' hmang hian kum 1980 chhoah min hruai lut leh a tih theih awm e. Instagram lama a post pakhatah chuan, "New Music, done the old way" tiin a ziak lang tel a, chu chuan a hla tharah 'style' hlui ziarang a tel zia a sawi lang chiang hlein a hriat.

Kumin kumtir lam aṭang tawh khan tuna a hla thar tihchhuah hi tawi te tein TikTok lamah chuan a tiri zeuh zeuh tawh a, chung clip tawi te te hrang hrang lo remkhawm a, a hla thar tur niawm tak lo siam tawk lah bo lo. Chutiang nawk karah chuan nimin khan hla thar mawi tak mai a rawn chhawp chhuak ta a ni.

A hla kan ngaithla zel a, a hla tawp lamah beisei loh deuhin Grammy Awards lama a inlanpui Maren Morris-i'n a rawn pui bawk a, a hla a 'catchy' bawk nen, a lar chho leh viauin a rinawm.

'Last Train Home' hi Toto ngaithla ṭhinte chuan an hla nen a kaldan phung a inzui viauin an hre mai thei. Chutiang ngaihdan i lo nei a nih chuan mak ti suh. Toto percussionist Lenny Castro, leh keyboardist Greg Phillinganes, Stevie Wonder, Eric Clapton, leh Michael Jackson-te pawhin an lo thawhpui tawh ṭhin a thawhpui miau a.

July 16-ah Sob Rock
John Mayer hian Ningani zanah khan a studio album pariatna tur Sob Rock tracklisting a tichhuak a, hla 10 a awm dawn.

Sob Rock hi a album thar tur hming a ni tih a puanzar hmain a hming hrim hrim hi a tilar lawk nasa hle a, khawthlang ram hrang hrangah chuan train station leh hmun hrang hrangah Sob Rock tih inziak tarlan a ni nasa hle.

A album thar turah hian single-a a lo tihchhuah tawh 'New Light', 'I Guess I Just Feel Like' leh 'Carry Me Away'-te pawh kha a dah tel a ni.