Judge tur zingah Fiona Pachuau

Kum 5 liam ta aṭanga Kohima-a Musicians Guild Nagaland-in kumtina an buatsaih ṭhin 'World Music Day concert'-a MG Music Awards judge tur zingah Mizo nula zaithiam Fiona Pachuau a tel.

Hri a len avangin kuminah hian Virtual-in concert leh MG Music Awards ceremony hi an buatsaih dawn a, Musicians Guild NL YouTube channel-ah June 21 zan dar 6-ah a en theih ang.

World Music Day lawmna hun hi Musicians Guild hian an buatsaih pui ṭhin hle a, Nagaland state-ah chuan concert lian ber zinga mi ni ṭhinin an state mai bakah hmarchhuak hmun hrang hrang aṭanga zaithiamte an inlan ṭhin a ni.

Fiona-i chuan Vanglaini zawhna chhangin,"Mizoram mai ni lo, hmundang pawh tela fan base nei ṭha deuh a an rawn zawng niin an insawi a, ka zai an lo hmuh ve aṭangte pawhin a ni ber ang chu," tiin Judge tura an rawn sawm dan a sawi a, hei hian Zoram pawn lamah pawh Fiona-i'n ngaihhlut a hlawh zia a tilang chiang awm e.

WMD Concert aṭanga an sum hmuh chhuah zawng zawng hi Musicians Guild Nagaland chuan hripui leng avanga harsatna tawkte ṭanpuina atan an hmang dawn.

MG Music Awards-a tel duh kan awm a nih chuan June 10 thlengin anmahni website lamah a inziahluh theih reng a, hmarchhak mi tan chuan a duh apiang tan a tel theih niin an website lamah chuan an tarlang a ni.

Fiona Pachuau Judge pui turte an hrawl
He huna endik hna thawk tur hian MG lam hian mi pali an thlang chhuak a, chungte chu Fiona Pachuau, Sanam Puri, Eshaan Noorani leh Among Jamir-te an ni.

Sanam Puri hi Indian pop rock band lar Sanam singer niin khawvel ram hrang hranga show neia zin kual ṭhin a ni a, Times Music Superstars awardee a nih bakah Radio City freedom Award leh Dadasaheb Phalke International Award-te pawh lo dawng tawh a ni.

Eshaan Noorani hi India rama guitarist leh hla phuahtu lar a ni. La hre lote'n kan hriat theih dan tur chuan Bollywood film lar Kal Ho Naa Ho music siamtu zinga mi a ni a, chawimawina a dawn tawh phei chu tarlan mai sen a ni lo hial.

Among Jamir hi indie music lamah chuan hriat hlawh tak a ni bawk. India rock band Agnee member niin Bollywood music composer lar ber zinga mi Pritam Chakraborty bassist a ni a, a sulhnu belhchian a dawl hle.

Heng mite bula Mizo nula Fiona Pachuau endik hna thawk tura thlan chhuah a ni ve hi a chhuanawm hle a ni.