Ex-Paulian '70 Golden Jubilee documentary video ‘I Tan Rimtui lo Chang Rawh Se’

Ex-Paulian '70 Golden Jubilee documentary video chu nizanah khan Zonet leh LPS lamah tihchhuah a ni a, Paulians lo ni tawh ṭhinte leh an batch ho chu an lung a leng ve ngei ang.

Mitin hian kan nunah hian ngaih bik, kan lung tileng bik kan tawng ṭhin. Chutiang chiah chuan Ex-Paulian '70 tia hming inphuahte pawh hian St. Pauls High School an kal lai kha an nuna an lung tilengtu ber zingah a tel tih a hriat a, documentary video hial tichhuakin nizanah khan an tlangzarh ta a ni.

Ex-Paulian '70 intite hi kum 1970 March thlaa St Pauls High School aṭanga Matric (HSSLC) exam hote an ni a, kum 1996 aṭang khan vawi eng emaw zat reunion nei tawhin tunah phei chuan an sulhnu eng emaw zat lanna documentary video an tichhuak ta hial a ni. He video hi anni chauh ni lo, an hunlai hre phak mi tam tak chuan an hlut hle ang.

An video-a thu inziak reng reng chu 'Mizo' thei ang berin an ziak vek a, khawthlang ṭawng inzepte pawh 'Zo' takin an ziak vek a, hei hian Mizo ṭawng an ngaihhlutzia a tilang chiang hle awm e.

Ex-Paulian '70-te hi mi hlawhtling tak tak an ni hlawm a, khawvel thila eizawnna kawngah hlawhtling tak tak an awm bakah hun puma rawngbawltu langsar tak takte pawh an awm a ni.

Nizana an video ente chuan kan hmu ṭheuhin a rinawm a, thlalak hlui mai piah lamah an time table te, fee an pekna receipt leh an exam admit card thlengin an la dahṭha hlawm a ni. Thil vawn ṭhat kawngah an entawn tlak khawp mai.

Subject tina topic hrang hrang an la tarchhuak thlap theite kha an entawn tlak a, an exam routine leh an exam roll.no zawng zawng nena an lo la dahṭha thlapte kha thil chhinchhiah tlak tak a ni.

An Golden Jubilee hla 'I Tan Rimtui lo Chang Rawh Se' tiha an batch hming zawng zawng bakah an zirtirtu hming nen lama an zep tel vek thei kha, kha mawlh mai kha an tuchhuan lo la awm turte thlenga thil hlu tur niin a lang.

Ex-Paulian '70-te'n documentary an siam ang hi thil intihhmuh chi tak niin a lang a, zirna run dang kaite pawhin rawn entawn se, khatiang documentary kha siam sup sup ila, kan tu leh fate tana rohlu tak kan hnutchhiah tur zinga mi pawh a ni ngei ang.