Casting Crowns-in hla thar ‘Scars In Heaven’ an tichhuak

Kristian band lar Grammy award hial pawh lo dawng tawh Casting Crowns chuan Zirtawpni liam taah khan hla thar 'Scars In Heaven' an tichhuak.

'Scars In Heaven' hi streaming platform hrang hrangah ngaihthlak turin a awm reng tawh a, audio bakah music video tichhuak nghalin, he hla hi November thlaa an tlangzarh tur an album tharah an dah tel nghal dawn bawk.

Frontman Mark Hall leh Matthew West-te phuah niin, a pi leh pu boral tur a nuin a bawihsawm laia a phuah ṭan a ni. Hall chuan lusunna tawhna kara an hla phuah chungchang chu sawiin khawvel a reh huai a, an aw hriat tur awm tawh lo turte kan ngaihtuah chhuak ṭhin. Mi kan chan chuan, rinna Pa aṭanga chhuak chauhin min thlamuan thei, a ti.

"Khawvel aṭangin thlamuanna awm thei lo a, khawvelah chuan kan bulah an awm tawh lo a ni tih min hriatchhuah tirtu an sulhnu chiah a awm tawh. Chuvang chuan kan tih theih awm chhun chu Pathian hnena ṭanpuina dil a, kan hriat reng dan ni lo, tuna an nihna zawk kan ngaihtuah a ṭul. Isua bulah an awm tawh a, 'Vanrama Ser' neitu awmchhun kut chuan a kuah tawh zawk a ni," tiin an hla thar chungchang chu a sawi.

'Scars In Heaven' hla hi Mizo-te pawhin nalh kan tih tur chi tak niin a lang a, Mark Hall sawi ang hian kan hmangaihte chuan min thihsan tawh mah se Pathian angchhungah an awm tawh zawk a ni tih hriat avanga Pathian fakna hla a ni.

Casting Crowns hi khawvela Kristian band hlawhtling ber zinga mi an ni a, an album hnuhnung ber kum 2018-a an tlangzarh 'Only Jesus' pawh kha an hlawhtlinpui hle a, an album title track phei chu RIAA Gold Certification an hmuhpui leh hial.

An hlate chu vawi maktaduai 290 chuang stream ni tawhin kumina an album tlangzarh leh tur pawh hi a hit leh viau ang tih a rin thiam theih.

Album 11 lai an tichhuak tawh a, kumin kumtawp lama tihchhuah leh an tum hi an album 12-na tur a ni.