Mystical Mizoram Ṭhazual Lengzem : Grace 10:45 'Kumtluangin' chart No.1 a ni

Mystical Mizoram Ṭhazual Lengzem chart-ah roreltu thar an awm a, chu chu Grace 10:45 niin a hla mawi tak 'Kumtluangin' chu pakhatna a nihpui. Chart top 10-a langte an ṭha a, YouTube lamah pawh thlirtu ngah tak tak an ni hlawm.

'Kumtluangin' a mawi ber mai
Grace 10:45-in kumin kumtir lama a tihchhuah 'Kumtluangin' chuan chart-ah hma a rawn hruai ve ta.

He hla hi a mawiin belhchian a dawl viau mai. Grace-i zaithiam dan hi a 'class' a, ani hi Mizo hmeichhe zaithiam zinga 'blues' music lamhawi tuipui tlemte zinga mi niin, a hlate hian belhchian a dawl ṭhin hle. Tuna chart-a pakhatna a nihpui 'Kumtluangin' pawh hi hla chuai mai lo tur chi niin a lang.

Music video pawh a hmuhnawm a, YouTube lamah pawh mi nuai hnih chuang laiin an thlir tawh.

Grace-i hi a hla dang reng reng pawhin belhchian a dawl ṭhin a, a hla tihchhuah tawh ho chu ama phuah vek a ni nghe nghe. 'Kumtluangin'-ah phei hi chuan K.Hminga nen thawkdunin 'Siar Lanu' hmanga Zofate min awitu K Hminga'n music a siamsak a, chuvang chuan a music pawh a mawi hle a ni.

Chart-a pakhatna a ni hi a mak lo a, chart lehah pakhatna a la nih chhunzawm zel thei dawn em tih hriat a chakawm tawh viau mai.

Pahnihnaah Mathlenga
Chart-a pahnihna chu Mathlenga 'Ka Duhaisam' a ni. Mizo Idol intihsiakna hmasa bera pahnihna hial ni thei Mathlenga hi hun eng emaw chen a reh hnuah rimawi khawvelah a rawn kir leh a, hla thar ṭha tak tak a tichhuak leh nual tawh a ni.

Jt Production hming a lang nawn leh
Tunlai Mizo lengzem singer zinga lawm hlawh ber pawl Jt Production chuan chart-ah hla pahnih lai a lanpui leh. Siampuii Ralte nena an sak dun Ka Hmangaih te' chu pathumna a nihpui a, 'Khuannu Ruat Loh' chu pasarihna a nihpui bawk.

Ṭhazual chart top 10-a lang zingah hian Essy, Jaui leh Ngurthansanga Kawlni te pawh an tel a ni.