Mizo Lal Bengkhuaia hmingchawiin Ramdaidêp chi thar hming phuah

Tunhnaia Mizorama Ramdaidêp chi thar hmuh chhuah chu Mizo Lal Bengkhuaia hmingchawiin 'Cyrtodactylus bengkhuaiai' tiin a hming an phuah.

Mizoram University-a Developmental Biology & Herpetology Laboratory (Department of Zoology) a Prof. H.T. Lalremsanga leh a research scholar-te chuan tunhnai khan Assam leh Meghalaya-a researcher an thawhpuite nen Mizoram leh Meghalaya a hmun ṭhenkhat an survey-na aṭangin state pahnih aṭangte hian species thar pahnih ve ve an hmu chhuak a ni.

Meghalaya-a mite hi Siju Cave (Garo Hills) leh a chhehvêl aṭanga an man niin an hming atan Indian herptologist ropui Dr.Ishan Agarwal hming chawiin 'Cyrtodactylus agarwali' leh Siju Cave a chinai lung hmun hmingchawiin 'Cyrtodactylus karsticola' tiin a hming an vuah.

Mizorama mi erawh chu Aizawl khawpui chhung leh a chhehvel, Mizoram University campus, Durtlang, Sihphir leh Ṭamdila mite niin a hmingah American herpetologist ropui, Prof.Aaron Bauer hming chawiin 'Cyrtodactylus baueri' tia vuah a ni. A dang pakhat chu Sailam ram leh a chhehvel, Sialsuk ram leh Hmuifang ram aṭangte a man niin Mizo Lal ropui, fing leh huaisen Sailam Lal Pu Bengkhuaia (1830 - 1879) hming chawiin 'Cyrtodactylus bengkhuaiai' tiin an phuah thung.

Heng species thar te hi an pianphung, phuhlip inrem dan leh chi fang (DNA) zirchian hnuah species thar an ni tih nemnghetin Zootaxa 4980(1)(https://doi.org/10.11646/zoota...) chuan June 2 khan a lo tichhuak (published) ta a ni.