Northern White Rhino an mang hnai takzet

Samak chi khat Northern White Rhino-te chu an mang ṭep tawh a, tunah hian khawvelah hriat theih chinah pahnih chiah an awm tawh. Chupawh a nu ve ve an la ni zui!

Khawvelah hian samak hi chi hrang hrang an awm a, samak thi hian chuti takin ngaihven a hlawh ngai lem lo. Mahse kum 2018 khan Northern White Rhino samak Sudan tia a hming an vuah, kum 45-a upa chu Kenya-a Ol Pejeta Conservancy-ah a thi a, he samak thi erawh hi chuan ngaihven a hlawh takzet. Khawvela Northern White Rhino pa awmchhun a nih tawh vang a ni.

Tunah hnaiah social media-ah mi ṭhenkhatin Northern White Rhino an mang vek tawh nia an pholan erawh a dikhlel deuh a, inthlah chhawng tur awm tawh chiah lo mah se a nu pahnih, Sudan fanu leh a tunu, Najin leh Fatu-te chu an la dam ve ṭawk ṭawk a, inthlah chhawng tur erawh an awm tawh lo.

Northern White Rhino-te hi
White Rhino hi chi hnih an awm a, a chidang zawk 'Southern White Rhino' chu tunah hian 20,000 vel bawr khawvelah an la awm nia hriat a ni. Northern White Rhino-te hi Africa khawmualpuia khawchhak lamah leh khawmualpui laili lamah an cheng ṭhin a, sang chuang fe hmuh tur an awm ṭhin.

Kum 1980 chhoah khan sapel ṭhinte'n an kap nasa hle a, kum 1979-86 inkarah ringawt khan 80% vel zetin khawvela hetiang samak awmzat hi a tlahniam hman! Kum 2006 hnu lamah phei chuan ramhnuaiah hmuh tur an awm tawh lo.

Kum 2018-a thi ta Sudan kha kum 1975-a an man niin fa pathum a nei a, mahse tuna la dam Nijin chiah hi a dam chhuak. Nijin leh Fatu-te hi venhimna khauh tak hnuaiah enkawl mek an ni.

Scietist-te hmalakna
Sudan thih hma khan scientist-te chuan a chi an la hman a, an dahṭha a ni. Najin leh Fatu-te an la dam bawk a, Northern White Rhino-te hi laboratory-a siam belh lam an sawi ri deuh niin science magazine ṭhenkhat chuan an tarlang.