Conjuring: The Devil Made Me Do It A hrang nasa

Box Office-ah 'horror' film pahnih an inhran khum dun nasa a, kar tawpah erawh 'A Quiet Place Part II' aiin 'The Conjuring: The Devil Made Me Do It' a hrang nasa ta zawk a ni.

'The Conjuring: The Devil Made Me Do It'
Conjuring Universe film thar ber 'The Conjuring: The Devil Made Me Do It' chu Zirtawpni liam taah khan US-ah tlangzarh a ni ta a, Box Office-ah rorel lai 'A Quiet Place Part II' nek chhuakin sum lalut tam ber a ni nghal.

The Conjuring film pangngaiah chuan a film pathumna a ni a, Ed leh Lorraine Warren-te case lar tak, 'Trial of Arne Cheyenne Johnson' a an inrawlh dan chungchang niin, kar tawp liam taah khan theatre 3,102 aṭangin $24,010,000 a lalut.

'Trial of Arne Cheyenne Johnson' hi thil tak tak thleng niin, kum 1981 khan Brookfield, Connecticut-ah tlangval pakhat Arne Cheyenne Johnson-in a in neitu a thah chungchangah a kawchhunga ramhuai lutin a thah tir nia a sawi chungchang a ni. Hetiang case hi US court-a an ngaihtuah hmasak ber a ni nghe nghe.

Rotten Tomatoes-ah chuan rating 5.8/10 a hmu a, film review-tu ṭhenkhat chuan a changtupa leh a changtunu Patrick Wilson leh Vera Farmiga-te chu fak viau mah se a film kalhmang erawh a prequel film-te a tluk lo deuh nite'n an ngaih thu an sawi.

Ram dang aṭanga a sum lakluh nen $maktaduai 57.8 vel sum a lalut tawh a, film siamna atana an budget chu $mtd 38 vel a ni thung.

Pahnihnaah 'A Quiet Place Part II'
Kar hmasa lama pakhatna 'A Quiet Place Part II' chu pahnihna a ni thung a, theatre 3,744 laiah chhuah ni leh mah se The Conjuring 3 erawh a tluk zo ta lo a, $19,500,000 lai chu a lalut leh tho.

Emma Watson channa Disney film Cruella chu pathumna niin theatre 3,922 laiah an tichhuak a, $11,243,000 a lalut a ni.

Film thar 'Spirit Untamed'
Sum lalut tam palina 'Spirit Untamed' hi animated-adventure film a ni a, 'Spirit: Stallion of the Cimarron (2002)' spin-off niin aw thawhtu pawh Isabela Merced, Jake Gyllenhaal, Marsai Martin, Mckenna Grace, Julianne Moore, Walton Goggins, leh Eiza González-te an ni hlawm hem mai. A hmuhnawm ang tih a chiang a, kar tawp liam taah khan $6,200,000 a lalut.

'Raya and the Last Dragon' chu pangana a la ni phak bawk a, film thar zingah Witnesses (11), Undine (18) leh All Light, Everywhere (22)-te chu chart-ah an lang a ni.