The Matrix 4-ah Christina Ricci

Kumin kum tawp lama tlangzarh tur, Sci-fi film The Matrix-ah Christina Ricci chu a inlan ve dawn.

A naupan laia The Addams Family film-a Wednesday Addams lema a chan aṭanga khawvelin a hmel hriat tawh Christina Ricci hi tunah chuan kum 41 lai a ni ve tawh a, khawvelin a ngaihven Sci-Fi film-ah hian ngawi rengin a lo tel ve reng tih tunhnai khan khawthlang lam media ṭhenkhat chuan an tarlang.

The Matrix 4 hi a chan hrim hrim chu an chang zo tawh a, chuti chung chuan Christina Ricci hming hi sawi lan a lo la ni ngai miah lo a, tu lemah nge a chan dawn tih pawh tarlan a la ni lo.

December 22-a tlangzarh tura an ruahman The Matrix 4 hi a film official title pawh an la puangzar lo a, Keanu Reeves, Carrie-Anne Moss, Jada Pinkett Smith, Lambert Wilson, leh Daniel Bernhardt-te chu an inlan leh dawn tih a chiang a, Priyanka Chopra pawh a inlan dawn bawk.

The Matrix 4 director Lana Wachowski leh Christina Ricci hi a hma pawhin an lo thawkdun tawh a, kum 2008-a tlangzarh 'Speed Racer'-ah khan an lo thawk dun tawh a ni.