Taylor Swift 'Evermore' 74-na aṭangin 1-naah

Billboard 200 chart-ah Taylor Swift chuan a album 'Evermore' hmangin pakhatna dinhmun a rawn hauh leh a, kar hmasa lamah khan 74-na niin tunkarah erawh pakhatnaah a rawn invawrh leh dawrh mai a ni.

Taylor Swift nge nge
Tunkar Billboard 200 chart-a pakhatna a nih leh takah hian Taylor Swift 'Evermore' album hi he chart-ah hian vawi li lai pakhatna a ni ta.

Kar hmasa chhung khan US-ah Taylor Swift album hian equivalent album unit 202,000 a hmu chhuak a, MCR data-in a tarlan dan chuan album sales aṭangin 192,000 lai hmu chhuakin hei hi kumin chhunga kar khat chhunga album sales ṭhat ber ṭum a ni.

'Evermore' album hi January 16 kara chart-a pakhatna a nih hnuah tunkarah hian pakhatnaah a rawn inhlangkai leh a, hei hi Billboard-in a lo tarlan tawh angin vinyl copy tunhnaia a tihchhuah vang niin a lang.

MCR Data siam aṭanga vinyl album hralh hnem ber record kar hmasa chhung khan a siam tih tarlan a lo ni tawh a, hemi avang hian tunkar chart-ah hian chart laihawl vel aṭangin nasa takin a rawn invawrh leh ta a ni.

Taylor Swift chuan social media lamah a album pakhatna a ni leh chu lawmawm a tih thu sawiin amah pawhin a rin phak bak a nih thu a sawi.

Swift hian nikum December 11 khan 'Evermore' hi a tlangzarh a, he album hmang hian hmeichhe artist zinga Billboard 200 chart-a No.1 album pahnih nei rang ber record hial a lo siam tawh. July thla tawp dawnah 'Folklore' tlangzarhin December-ah 'Evermore' hi a tlangzarh lehnghal a ni.

Artist 100 lamah pawh Taylor Swift
Taylor Swift hi Artist 100 chart-ah pawh topper a ni a, kar hmasa lamah kan 17-na niin tunkarah hian pakhatnaah a rawn invawrh leh ta a ni. He chart-ah hian kar 358 lai a lang tawh. Pahnihna chu kar hmasa lama pakhatna Olivia Rodrigo a ni a, a ni hian a album 'Sour' kha tunkar Album chart-ah pahnihna a nihpui ve bawk. Pathuma chu tunhnaia album thar hit tam tak tichhuaktu J. Cole a ni.

Butter, BTS, Butter
Single chart lamah chuan BTS 'Butter' a la hit chhunzawm zel a, Billboard Hot 100 chart-ah a zawnin pakhatna a ni ta. K-Pop super group hla 'Butter' hi Billboard Global 200 chart-ah leh Billboard Global Excl. US chart-ah pawh topper niin, anni band hi Artist 100 chart lamah pawh pathumna an ni.

Taylor Swift, BTS leh Olivia Rodrigo-te hi Billboard chart hrang hrangah an che ṭha hlawm hle. Olivia Rodrigo hlate chu single chart lamah che ṭha zelin 'Good 4 U' chu Hot 100, Billboard Global 200 leh Billboard Global Excl. US chart-ahte BTS 'Butter' thachhang dawltu niin pahnihna a ni vek.