‘Knives Out 2'-ah ‘Outer Banks’ star Madelyn Cline

‘Outer Banks’ aṭanga lemchan khawvelin a ngaihven Madelyn Cline chuan Daniel Craig kiangah lem a chang dawn a, ‘Knives Out 2'-a chang tur zingah a hming ziahtel a ni ve leh ta.

'Knives Out 2'-a changtu tur tarlan tawhte chu an hrawl hle a, chung zingah chuan Medelyn Cline hi a tel ve ta a ni. Dave Bautista, Janelle Monae, Kathryn Hahn, Leslie Odom Jr., Kate Hudson leh Edward Norton-te nen an chang ho dawn a, production pawh an la ṭan loh 'Knives Out 2' hian thawm a nei ring ṭan hle.

March thla khan Deadline chuan 'Knives Out' chhunzawmna pahnih siam tura thuneihna (rights) hi Netflix chuan $mtd 400 velin a lei dawn niin a lo tarlang tawh a, March thla tawp a nih meuh chuan Media Rights Capital leh Lionsgate kut aṭangin $mtd 450 velin an leifel thu kan hre ta a nih kha.

Craig chu a chang chhunzawm leh dawn tih tarlan a nih tawh bakah film hmasa director Johnson pawh an befel tawh a ni.

Madelyn Cline hi nikum lama Netflix hit ‘Outer Banks’-ah changin lawm a hlawh hle a, tunah hian 'Outer Banks' season 2 pawh chang zo leh tawhin kumin hi chuan tihchhuah hman turin ruahmanna an siam bawk.

'Knives Out 2' erawh hi chu kumin nipui chhung hian Greece-ah chan ṭan an tuma ni.