A pianna ramah Dua Lipa-in lawm a hlawh

Kum liam ta, kum 2020 chhung khan United Kingdom-a chengte chuan an ram zaithiam lar Dua Lipa zai an ngaithla tam ber.

UK-a music licensing company Phonographic Performance Limited (PPL) chuan data an tihchhuahah nikum chhung khan UK-a chengte chuan khawvela zaithiam hrang hrang tam tak awm zingah an fanu duatlai Dua Lipa zai an ngaithla tam ber a, chutiah rual erawh chuan kumina BRIT Award dawngtu The Weeknd hla 'Binding Lights' chu an hla ngaithlak tam ber a ni thung.

Ed Sheeran pahnihnaah a awm ve a ṭul ta
PPL hian Nilaini khan list hi tichhuakin kum 2017 aṭanga UK mipuite'n a zai an ngaihthlak nasat ber ni char char ṭhin Ed Sheeran chuan a dinhmun ṭhin chu Dua Lipa a ken ve a ngai ta.

'Perfect' hitmaker hian hun eng emaw chen chawlh a lak lai takin Dua Lipa hian album hit tak mai 'Future Nostalgia' a tichhuak ve thung a, a upbeat retro pop leh disco album chu UK mipuite'n an lo ngaina ngang a ni tur a ni, Ed Sheeran meuh pawhin a tluk pha ta lo.

Hnam fing an ni bawk a, an ram chhul chhuak zaithiam an ngaihlu thiam ṭhin a, zaithiam zai an ngaihthlak nasat list 10 PPL-in a tihchhuah zingah pawh hian an ram mi an intlar thla duat a tih theih awm e. US lamah an ṭawng ang hmang ngei, zaithiam tak tak an awm laiin an ram zaithiam ngei an ngaithla tam ber ṭhin hi an entawntlak hle. Dua Lipa bakah hian Ed Sheeran, Sam Smith, Calvin Harris, Little Mix leh Coldplay-te chu list-ah an lang a ni.

Dua Lipa hi kum 2018 khan he chart-ah hian lo lang tawhin pariatna a lo ni tawh a, chumi hnuah chuan a reh zui deuh a, kuminah erawh pakhatnaah a rawn awm ta vung mai a ni. UK mipuite'n a zai an ngaithla tam ber erawh hi chu a mak hran lo a, kumin BRIT Awards-a Best British Album leh British Female Solo Artist award a dawn aṭang khan a chi leh kuangte zingah a tlana hle tih a hriat.

Single an ngaihthlak tam ber The WeeKnd 'Blinding Lights'
Canadian Singer The Weeknd hla hit 'Blinding Lights' chu UK mipuite'n nikum chhunga an hla ngaihthlak tam ber a ni thung. He hla hi The Weeknd hian kum 2019 kum tawp dawn hnaiha a tlangzarh kha a ni a, UK mai ni lo, khawvel ram tinah nikum chhung khan a lar hle.

A hla tihchhuah tawhah chuan a la hlawhtlinpui ber a ni hial a, nikum chhung ringawt khan International Federation of the Phonographic Industry (IFPI)-in a tarlan dan chuan vawi tlukledingawn 2.72 lai khawvel pum huapin stream a ni a, hemi a nih avang hian UK-a hla ngaihthlak tam ber a ni pawh hi a mak lo.

Hla ngaithlak nasat zual 10 PPL-in a tihchhuahah hian Dua Lipa bawk a che ṭha hle a, a hla hit 'Don't Start Now' chu 'Blinding Lights' thachhang dawltu chiah hi a ni a, 'Physical' kha UK mipuite'n an hla ngaihthlak tam pasarihna a ni bawk.