Kum 2021 Olivia Rodrigo tana kum ṭha

Kumtir aiin a let riatin a hausa tawh! an ti

Tunlaia zaithiam lar ber zinga mi, American tleirawl Olivia Rodrigo chu kumin kumbula a sum neih zat aia tam fe sum a nei tawh ang tih a rin thiam theih a, helam chhut ṭhin Celebrity Net Worth chhut danga ṭanga en chuan kumin kumtir ai khan tunah hian a let riat velin a hausa tawh a ni.

Kum 18 chauh a la ni a, chuti chung chuan khawvela zaithiam lar ber zinga mi a ni der tawh. Album pakhat chiah a la tlangzarh a, chu a album chu Billboard 200 chart-ah pakhatna hial a nihpui tawh bakah ram hrang hrang chart-ah a che ṭha hle.

A single tihchhuah tawh pathum chu Billboard Hot 100 chart top 10-ah an lang vek a, pahnih phei chu chart No.1 an ni hial! Heng kan tarlan zawng zawng hi kumin chhunga thil thleng vek a ni.

January ni 1-ah kha chuan 'High School Musical: The Musical: The Series' en ṭhinte bakin Olivia Rodrigo hi an hre kherin a rinawm loh. Mahse January 8-ah 'Drivers License' a tlangzarh a, khawvelin an ngaihven rawn nghal. Tunah erawh chuan rimawi lam tuipuitu zingah chuan a hming hre loa ram pawh an awm tawh awm lo e.

'Drivers License' ringawt pawh hi Spotify lamah chuan vawi maktaduai 830 chuang stream a ni tawh a, a hla dang pawh a hit chho zel bawk nen, kum khat chhunga a nuna thil thleng danglam nasa lutuk hi amah pawhin rin thiam har a tih thu a sawi chhuak hial tawh a nih kha.

Hla a hralhna bakah a merchandise-te pawh hralh a kal viau a, tunah chuan a hausak zawng hi $maktaduai 4 vel a tling tawh niin Celebrity Net Worth chuan a chhut. Kumtirah kha chuan High School Musical lama a hlawh chhuah nen, $500,000 vel a nei angin Popbuzz chuan an chhut a, tunah erawh a let riat laiin a sum neih hi a tam tawh a ni.

Social Media lamah pawh a tla na sawt hle, kum liam ta lama tu'n an ngaihsak loh kha tunah chuan Instagram lamah pawh follower mtd 11.9 chuang a nei tawh a, Twitter-ah follower maktaduai chuang nei tawh bawkin TikTok lamah pawh mi maktaduai 7 chuangin an follow tawh bawk. YouTube-a a video dah tawh zawng zawng thlirtu zat pawh tluklehdingawn 7 chuang an ni tawh!