Khuangleng tlangval, Nephrology-a Doctorate of Medicine thukhawchang

Champhai district-ah pawh Myanmar bul hnai lama awm, Khuangleng khaw tlangval Dr C Malsawmkima chuan tun hnai khan AIIMS, Jodhpur aṭangin DM Nephrology a zo - 'Super Specialist' a ni ta.

Dr C Malsawmkima hian MBBS chu JIPMER aṭangin a zo a, PGIMER, Chandigarh aṭangin Post Graduate degree (Specialist)a zir zo leh. Kum 2018 khan DM Nephrology zir turin a inziak tling a; Nilaini khan Nephrology-ah Doctorate of Medicine hi a hmu leh a ni.

DM chu eng nge ni?
Doctorate of Medicine chu Postgra-duate Super Speciality Degree niin India rama medical line-ah chuan zir theih sang ber zinga mi a ni. Mizo zingah DM zir zo hi pathum chiah an la awm a, damlai zingah phei chuan pahnih chiah an awm. A tlukpui Master of Chirurgiae (MCh) leh Diplomate of National Board (DNB) super specialist degree nei pawh an la tam lo viau mai.

Thingtlang tlangval DM zir zo hlimin Facebook lamaa thu ziak ama phalna lain Mizo ṭhalaite tán kan rawn chhawp chhuak e.
Kum tam tak liam ta 2006-ah class 12 zir zawh hlima doctor zir ve tuma entrance kan pek zawh hnu chuan. Mahni khaw lam panin ka haw ve ta a. Nipui alo thaw a, hlo thlawh hun a inṭan a thingtlangah chuan. Entrance result chu nghakhlel tak siin hriat hun a huphurhawm em em lawi si. A chhan chu, tlin loh chuan engtin nge hmalam hun tur kha ka hre bik si lo.

Result chhuah ni chuan ka nu nen huanah vaimim hmun kan thlo a. Ni a sat em avangin thingbuk hnuai ah chuan ka lo muhil a. Ka harh hnu chuan, ka nuin a mumang a ṭhat thu min hrilh a. In kan haw chuan khua hi athim tan tawh a. Ka inbual fel hnu chuan, Mizoram pumah pakhatna ka nih thu chu kan hre ve ta. Kan va han lawm ve tak em khami ni kha. A hlutna kha kan manpha lo mah zawkin ka hria. Ka nu hian a mumang kha ala hria em ka hrelo a, tun thleng hian zawh ka duha, mahse ka la zawt chhin lo. Ka duh tawk ka zir zo ta bawk a, ka haw velah ka zawt ang.

Hun alo kal zel a…. hringnun chawhnu raih khawpa zan tam mut kham lo leh taksa leh rilru senga tha thlah loa kum 15 ka beihna a lo ni ve ta reng mai. Mahni degree neihte sawi chiam hi thil nuam pawh a ni lo e. Amaherawh chu inthlahrung tak chungin, phu lo inti leh insit tak chungin, doctor degree India rama kan neih theih level sang ber line pakhatah, Mizote zinga a hmasa ber niturin Nephrology-ah a sakhming mawi ka tih em em mai "Doctorate of Medicine (DM)" Superspecialist degree chu ka hlawh chhuak ve thei ta. A rei lo thei ang bera zir char charna chance nei vai thiam fal ho tan pawh kum 12 vel chu a ngai hrim hrim a.

A kawng hi a thuiin a bumboha, a kar lakah zir tlawlh neuh neuh leh inhlawh pah, inbuatsaihpah chhung nen kum 15 lai ka seng a nih ber chu. Vana raha ngai chung leh rim tina tin loh tur tawpa ka dahsan ni ṭhin mahse, zir zira entrance-ah pawh tlin loh nawn awn awn hnuah pawh tih luih tlat chuan kan tling ve ta mai chauh kha a ni a. AIIMS common entrance-ah India ram puma kan inchuh General Quota seat 4 chiah awmkha tihpalh thilah kan eihek sak ve thei hram chauh kha a ni a. Specialist zir zawha ka pass kan lawmnaah ka tlin hma chu vawi 20 tal ka beih tur thu kha ka sawi ve tawp a. Zir lo thei lo dinhmunah ka insiam sa der kha a ni a.

Zir reng renga hun hmangin, hringnun chhuk chho man lo leh perh thelh tam tak nei mah ila. Fel vang leh ṭhat vang ni loa, thawhrimna ngaisangtu Pathian a nih miau avangin, kan Pathian chuan kan dil vete min pe a tun hun min hruai thleng hi ka lawm ve em a, ka lo tlak ve duah a ni e.

"Doctorate of Medicine (DM)" bik hi Mizo te zingah pathum (3) chiahin an la hlawh chhuaka, damlai mi pahnih (2) chiah an awm zuia. A tlukpui MCh leh DNB superspecialist degree nei pawh mi tlemte chauh kan la awm a. Ṭhangtharte tan chona lo ni se, kan mamawh tak tak zir kan la awm lohna ala tam mai a. Kan ram health care level sang zawka kan hruai ve theih nan theihtawp rawn chhuah turin ka sawm a che u.

Tun hun ka thlen theih nan a kil a lung ṭangkai tam tak an awma. Vawiin niah hian lawmthu ka sawi nawn leh duha. A hmasa berin ka pa min boralsan tawh leh ka nu chungah ka lawm em em a. Ka u leh naute min support-naah ka lawm a. Pawl hniam ber aṭanga tun thlenga min zirtirtute zawng zawng chungah lawmthu ka sawi a. Min ṭawngṭaisak ṭhintute chungah ka lawm em em bawk. A bik takin, ka pa Sapchhawna leh Sir Zautea te nasa taka lehkha ka zirlaia min puih tawhnaah ka lawm tak zet a ni. Midang tam tak sawisen loh hnenah lawmthu sawina tur ka nei.

Ka trophy lak theih hnuhnun ber hi ka nu tan ka hlan e.

Ka lawm e.