Marshmello album thar Shockwave a ngaihthlak theih ta

Electronic Dance Music (EDM) ngainatute tana thu lawmawm tak hriat tur a awm. Nimin khan American DJ Marshmello chuan album thar 'Shockwave' a tlangzarh.

'Shockwave' hi Marshmello album palina a ni a, kum 2019-a Joytime III a tlangzarh hnua album a tihchhuah leh hmasak ber niin track 12 a awm a, chung zingah chuan ni thum liam ta lawka Megan Thee Stallion nena an tihchhuah 'Bad Bitches' pawh kha a tel.

Nimin khan a album thar tihchhuah rualin a album title track 'Shockwave' music video a tichhuak nghal a, a album thar hi a duh apiang tan streaming platform hrang hrang aṭangin a ngaihthlak theih tawh bawk.

Megan Thee Stallion bakah hian Juciy J a thawhpuina 'Hitta' pawh he album-ah hian a awm. Anni bakah hian SIPPY, TroyBoi, Subtronics leh Nitti Gritti-te pawh a thawhpui a, nimin piahah khan Subtronics a thawhpuina 'House Party' chu a tlangzarh a ni.

Marhsmello, a hming tak Christopher Comstock hi tunah hian kum 29 a ni tawh a, a rimawi lo tihchhuah tawhte a hlawhtling ṭhin hle a, platinum certify music-te pawh a nei nual tawh.

2021 UEFA Champions League Final-ah khan opening ceremony-ah inlan bawkin virtual show ropui tak mai khawvel a entir a, sawi zui pawh a hlawh viau a nih kha.

'Shockwave' tracklisting
1 Fairytale
2 Supernovacane
3 Jiggle It
4 Back It Up
5 VIBR8
6 Bad Bitches (Ft Megan Thee Stallion)
7 Back In Time
8 Hitta (Ft Juicy J)
9 House Party
10 Candy Kid
11 Pushin Stacks
12 Shockwave