Hmangaih Chunnu hlahril inphuahsiakah H Lalchhandama leh Jenny LS Hmar-te pakhatna an ni

Miss Mizoram Foundation buatsaih 'Nute ni pual hlahril (poetry) inphuahsiak' result chu June 11 khan Zonet TV channel kaltlanga puan niin, kum 18 hnuai lam category-ah H Lalchhandama (kum 18), Ngopa Chhimveng chu pakhatna niin, kum 18 chunglam lam category-ah Jenny LS Hmar (kum 26), Chanmari Aizawl chu pakhatna a ni ve bawk.

He hlahril inphuahsiakah hian hlahril 548 lai thehluh niin, intihsiakna hi online-a buatsaih a ni. May 6 -11 inkarah khan thehluhna hun hawn niin, category pahnih kum 18 hnuai leh chung lam tan intihsiakna hran siam a ni.

Lalsangzuala, Assistant Professor, Mizo Department, MZU leh Lalhruaitluanga Chawngte, Author-te chuan heng hlahrilte hi an endik a, category pahnihah hian mi 10 ve ve consolation prize dawng tur thlan an ni a, consolation prize dawngtute hnenah hian E-Certificate hlan a ni bawk.

Miss Mizoram Foundation president Rody H. Vanlalhriatpuii chuan hun harsa tak karah hlahril inphuahsiak an buatsaih thei chu lawmawm a tih thu sawiin, he intihsiakna ngaihlu a rawn tel zawng zawngte MMF aiawhin thinlung takin lawmthu ka hrilh che u a ni, a ti.

Kum 18 hnuai lam category result
Hlahril lut zat : 246
1. H Lalchhandama (kum 18, Ngopa Chhimveng
2. Lalnunthari (kum 18), Chanmari Aizawl
3. B Lalhruaitluanga (kum 18), Hmarveng Kolasib

Lawmman:
1. Rs. 7,000 + citation
2. Rs. 5,000 + citation
3. Rs. 3,000 + citation

Kum 18 chunglam lam category result
Hlahril lut zat: 302
1. Jenny LS Hmar (kum 26), Chanmari Aizawl
2. Obeda Lalhuliana (kum 35), Vaivakawn Aizawl
3. Priscilla L Fanai (kum 20), Seventh Day Tlang Aizawl

Lawmman:
1. Rs. 10,000 + citation
2. Rs. 7,000 + citation
3. Rs. 4,000 + citation

NU HMANGAIHNA
('Pa' tel loa sei lian zawng zawng te tân ka hlân e.)
- Jenny LS Hmar

Nu, nang ka hnena min petu hi, Pathian a nih si chuan,
Ani chu kumkhua atân chawimawiin awm rawh se.

Engkim mai hi chhan neia ruat leh thleng a nih si chuan, 'Pa' tel loa sei lentir ka nih chhan chu,
I ropuina leh hlutna ka hmuh famkim theih nân a ni ngei ang. 'Pa' bula sei lian ni ila chuan,
Heti tak maia ka tâna, I hlutna leh ropuina hi,
Ka hre fiah zo dâwn si lo.
Ka pa chuan i tih theih tam tak hi hliahin,
I ropuina hi a zâtve emaw chauh ka hmu âwm si a.

Khawvela nu ropui ber, inpumpêknaa khat nu ka nei tih ka hriat fiah theih nâna 'Pa' tel loa sei lentir ka lo nih avang hian lawm thu ka sawi fo tawh zâwk ang.

Nu, nang chu 'lui tui luang lai' nen hian ka tehkhin ṭhin che.
Lui tui chu dam diaiin a luang delh delh a; mahse, a kawnga khâm leh suar, lungpui lian pui puite chuan an dang zo chuang hauh si lo.
Ram tinah luangin, a luang zel a, ramsate chhâwlhâl dawmtu, Thil nung tinrêng te inhnangfâkna a tling ṭhin ang hian,
Nang pawh hmeichhe âwm nêm tê angin i lang a; mahse,
Ka tâna i beihna leh inhlânna hi eng harsatna mah hian a dang zo chuang si lo. Ka tân i ding a, ka tân i thawk a, ka tân bawk i tâwp leh ṭhin.
Nu, nang chu 'luang' nen hian ka tehkhin ṭhin che.
A kûng chu nêm hle mah se, thli na takin a chhêm âwn riai riai châng pawha, Tlu sawp mai loa,
A ding chhuak leh ṭhin ang hian,
Nang pawh harsatnate'n an beih châng che hian, I beidawng ve ru ve ṭhin tih ka hria.
A rûk têin i rûm ve vawng vawng ṭhin a,
I mit ata mittui a hnâm chhuak ve ṭhin tih ka hria. Mahse, i tlu sawp ngai lo a, Harsatna kârah pawh i ding chhuak leh fo ṭhin hi,
A mak ka ti ṭhin.
Hmeichhe der dêp tak anga lang,
Chhungrila beidawnna hneh thei tura thuam i ni si a.

Nu, nang chu 'tûktinpâr' nên hian ka tehkhin ṭhin che.
Ni sen sa hnuaia pár a nih avangin tûktinpâr chu zantlai lo niin, A lo vuai a ni thei e.
Mahse, tuk thar lo her chhuakin a pár thar leh ṭhin ang hian, Nang chu nilênga ka tâna i thawh rim êm avangin,
Tlai lamah chuan i chau ve viau ṭhin a.
Thup tum ṭhin mah la,
I hmel dùl raih kha ka hai ngai lo asin.
Mahse, tûk thar lo thlengin, hmel hlim leh nung sára min kai tho leh ziahtu ka nu, “Nangmahah hian a siamtu che hian,
Eng chakna nge a phûm rûk bîk le aw?” ka ti fo ṭhin.
Nu, nang chu 'rose pâr' nen hian ka tehkhin ṭhin che.
Rose pâr mawina hmu tur chuan, A hlîng kan en kân a ngai
ṭhin ang hian,
I mâwina hmu tur chuan,
Ka tâna i thawh rim luat avanga, I kut leh ke pawr fip fep te en loa,
I mawina chhungril aṭanga lo pár chhuak ngei kha hmu thiamtu nih a ngai si a.

Nu, nang chu 'bawng êk' nen hian ka tehkhin ṭhin che.
'Bawng êk' chu thil tenawm anga ngaih ni mah se,
Pangpar mawi taka a pár theih nâna châwm lian ṭhintu a ni si a.
Nu, nang pawh hian mawi taka ka pâr vul ve theih nân,
mi duh loh thuamhnaw i inbel a, Mi thawh duh loh tam tak
i thawk ṭhin si a.

Nu, ih maw,
Khuanu hian duhthusam pakhat chiah tihhlawhtlinsak
min tiam ta sela, Khawvela ziak mi (writer) lâr ber
berte zinga pakhat nih ve ka dîl ngei ang. Khawvela
nu ropui ber i nih thu leh,
Ka tâna hlu ber i nih thu hi, khawvel hriata lehkhabu hmanga
ka puan chhuah ve theih nân.
Nu, ka hmangaih che. Khuanu'n zahngai sela,
I dam chhung ni sei mawlh rawh se.

HMANGAIH CHÛNNU
- H Lalchhandama

Khawvel eng hmu thei tura min hringtu;
Saisen tet aṭanga min chawi lian tu ngei mai;
Tlak chham ka nei ang tih hlauin,
Hrehawmna pawi sa lo a hmangaihna nena min enkawl tu.

Ka nu, nang hi I ni asin,
Ka nu, ka hmangaih che.

Kan lo ṭhanglian a, khawvel hrehawm kan dai a.
Natna leh lungaihna in thla a zar a;
Tlakchhiatna leh manganna sala kan tan lai leh,
Hlimna leh lawmna ten min kalsan lai khan

Ka nu, nang Chuan min kalsan ngai si lo,
Ka nu, ka hmangaih che.

Ka tana I thil tih theihnghilh ava har dawn em;
Tlai taka ka awm theih nan rilṭam I hnial lo a,
Ka nawmsak theihnan thawh hreh I nei hek lo.
Ka retheih I hlauh luatan nang I rethei si.

Ka nu, malsawmna hnar ilo ni e,
Ka nu, ka hmangaih che.

Khawvel zau tak, mi tin mi tang awmna;
Ṭhenrual ṭha te leh ka di lenna hmunah ngei hian,
Kil tin kil tang fang kual in, hawi vel mah ila,
An sawi hmangaihna dik min pe tu chu,

Ka nu, nang chauh hi I ni asin,
Ka nu, ka hmangaih che.

Khua a rei a, ka kumtluang par pawn chuai lam a pan ta.
A tisa chuar leh dang dem mai chuan,
Thlankhur chhunga mittui far hun tur min ngaihtuah tir ṭhin;
Mahse maw, ka tana a nunna hial hlan ngam tur ka nu hi,
A ni tel in ka hmangaihna a zual si.
Hmangaih chûnnu, chatuan hmangaihna min pek avangin ka lawm e.
Ka nu, ka hmangaih che.