Ryan Reynolds, Blake Lively leh L.A. Mayor-te Marginalized Community-te tan an thawkho

Los Angeles Mayor Eric Garcetti chuan Zirtawpni liam ta khan a kaihhruai Evolve Entertainment Fund leh Ryan Reynolds leh a nupui Blake Lively-te'na an din Group Effort Initiative (GEI)-te chu thlunzawmin Marginalized Community-te'n hna an neih theihna turin hma an la dawn tih a sawi.

Evolve leh GEI thlunzawm hmalakna hnuaiah hian LA mai bakah US khawpui dang leh khawvel ram hrang hranga mite tan kawng ṭha zawk an hawn sak dawn a, khawthlanga mihnuaihnung zawkte'n entertainment industry-a hna, training leh mentorship ṭha an neih theihna turin hma an la dawn a ni. Kum thum lo kal leh turah hian internship 1,000 bakah hna 150 vel pek hman an tum.

GEI hi nikum August thlaah khan Reynolds-te nupa hian an din a, mihang, ram leilung neitu, vun rawng dang leh marginalised community dangte'n entertainment lama hna leh hmabak eng zawk an neih theihna tura an din a ni.

Evolve ve thung hi chu kum 2018-a din tawh kha niin tunah hian entertainment 152 leh comunity 28 an thawhpui mek a, Netflix, WME leh Disney ABC Entertainment-ahte an hmalakna hnuaiah hna eng emaw zat thawk an awm tawh.

Deadpool actor Reynolds chuan GEI chu an din aṭanga kum khat pawh a la liam hma hauhin miin an tuipui chu lawmawm a tih thu sawiin, hma nasa zawka an lak theihna atana Mayor Garcetti-a'n a pui chu lawmawm a tih thu a sawi.