Milar bungraw hlui ṭhahnem tak an lilam Kurt Cobain-a'n a lem a ziah pawh a tel

Milar tam tak tak bungrua lilam a ni a, heng aṭang hian $mtd 5 chuang sum an hmu chhuak

Julien’s Auctions buatsaihin Zirtawpni leh Pathianni liam ta inkarah khan milar bungraw hlui sang chuang zet mai lilam a ni a, hemi aṭang hian $maktaduai 5 chuang sum an hmu chhuak. Chung zingah chuan Nirvana frontman Kurt Cobain-a'n a lem a ziah pawh a tel.

Kum 1992-a Nirvana-in Nevermind tour an neih laia Cobain-a'n a lem a ziah chu $10,000 vel man nia an chhut laiin lilamnaah chuan a let 28 laia to, $281,250-in an hralh a ni.

Bungraw lilamnaah hian artist lar tak tak- Eddie Van Halen, Alex Van Halen, The Beatles, Elvis Presley, Cher, Lady Gaga, Madonna, Jimi Hendrix, Bernie Taupin, Tom Petty, Tupac Shakur, Whitney Houston, The Doors leh Little Richard-te bungruate pawh an hralh tel bawk.

Prince-a 1994 blue Cloud guitar $60,000 an chhiar chu $281,250-in an hralh bawk a, Yamaha Elton John Signature Series C-1 Baby Grand Piano, Elton John-a hming ziahna chu a ṭhutna nen $150,000-in an hralh thung.