Ṭhian lungdum : Mizo Film thar tur

Nikum lama Zo Siam YouTube channel-a tlangzarh, JH Peka hla 'Ṭhian Lungdum' tih kha i lo ngaithla fuh ve tawh em? Kha hla behchhan khan Mizo film thar siam a ni a, a film hmingah pawh a hla hming ang tho 'Ṭhian Lungdum' tih a ni.

'Ṭhian Lungdum' hi tunah hian tlangzarh mai theih turin an buatsaih mek a, hrileng a ziaawm chuan, remchang hmasa berah film siamtute chuan tlangzarh an tum.

Mizo Film Forum member- Zote Entertainment leh Orphanage Picture-te bakah Lunglei ṭhalaite ṭangkawpin an buatsaih niin, hripui leng karah film shooting hi an nei a ni.

"He Film hi Lunglei ah shooting neih niin ṭhian ni chunga a ruka induh tawn leh inhmangaih dun tak, mahse ṭhian anga bul an ṭan avanga an inhmangaihna par chhuah hleihtheih loh laia tu emaw a lo tlak zeh leh zel tak avanga an boruak chhe chho ta lam niin, film-a a tam zawk hi a tak tak behchhana ziah leh siam a ni a, a bikin ṭhalaiteah a tlak nat viau kan beisei," tiin Director H. Lalsangzela (Mike-a) chuan a sawi.

Hripui kara shooting neih chu hautak a tih thu sawiin ani hi Mizoram Film Forum-ah Board of Directors member a ni mek a, a film siamah hian amah ngei a inlan bakah script pawh ama ziah a ni.

Director of Photography chu Sammie Pachuau a ni a, Elijah Khawlhring chu Co Producer niin, JH Peka, he Film story neitu leh hla neitu ni bawk chuan Screenplay lam a buaipui thung a ni.

Mizo film danga kan lo hmuh tawh ṭhinte bakah hmelthar lemchan thiam tak tak- Joseph C Lalrotluanga, Alice Lalrintluangi, C Vanlalmuana, R Lalrempuii, PC Hmingthanzuala leh Malsawmkimi Sailo te an inlan dawn.

He Film-a hlate hi a changtute sak tak tak leh anmahni phuah vekte a ni dawn bawk.