Box Office : A QUIET Place Part II a bengchheng leh ber

North American Box office-ah chuan chart hmasa lama sum lalut tam ber dawttu 'A Quiet Place Part II' chu kar tawp liam taah khan sum lalut tam ber a ni leh thung a, film tlangzarh thar pahnih 'In the Heights' leh 'Peter Rabbit 2: The Runaway'-te chuan sum lakluh tam lamah an pha lo a ni.

A Quiet Place Part II-in sum a lalut tam tawh
Kar tawp liam ta chhung khan 'A Quiet Place Part II' hi theatre 3,515-ah chhuah a ni a, $12,012,263 lai sum a lalut leh.

He film hian North America Box Office aṭang ringawt pawhin $109,352,478 lai sum a lalut tawh a, $mtd 61 vel senga an siam film hi a hlawkna an tel tam tawh hle. Ram hrang hrang aṭanga a sum lakluh zawng zawng belhkhawm chu $199,603,752 lai a ni tawh.

Emily Blunt leh a pasal John Krasinski-te channa film hian hripui leng kara tlangzarh kara sum lalut tam ber record pawh a lo siam tawh a, critics lam pawhin an fak hle a ni.

Beisei phak lo 'In the Heights'
Film tlangzarh thar 'In the Heights' chuan beisei a phak lo hle a, $maktaduai 11.4 chiah sum a lalut. Mi ṭhenkhatin an chhut lawk dan chuan $mtd 20 tal a lakluh phak an ring a, mahse an beisei a pha lo hle a ni.

American musical drama film 'In the Heights' hi kar tawp liam taah khan theatre 3,456-ah pekchhuah niin $11,405,000 sum a lalut.

$mtd 55 vel lai senga an siam film hian an budget hmu chhuak tur chuan a la beih fat fat a ngai dawn niin a lang.

Pathumna Peter Rabbit 2: The Runaway
Kum 2018-a tihchhuah computer-animated adventure comedy film 'Peter Rabbit' chhunzawmna 'Peter Rabbit 2: The Runaway' chu Zirtawpni liam ta khan US-ah tlangzarh niin theatre 3,346 aṭangin $10,400,000 a lalut.

US-a tlangzarh a nih hmain ram dangah tlangzarh a ni nual tawh a, chung ram aṭang chuan $57,900,000 lalut tawhin ram hrang hrang Box Office aṭangin $68,300,000 a lalut tawh a ni.

Flim thar dangte chu
Box Office chart-a pasarihna 'The House Next Door: Meet the Blacks 2' leh pakuana 'Queen Bees' te chu top 10-a film thar lang dangte an ni.

Heng bakah hian '12 Mighty Orphans' (11), 'DOMINO: Battle of the Bones' (16), 'Censor' (17), 'Holler' (22) leh 'Final Frequency' (27)-nate chu chart-a lang thar an ni bawk.

Khawthlang ram lamah chuan hrilengin ziaawm lam a pan ve zel bakah vaccine an la ṭha bawk a, film industry-a sum lut pawh a tam sawt hle. Theatre an hawng tam telh telh a, film thar ṭha tak tak tlangzarh hun pawh tikhawtlai loin an tlangzarh ve zel tawh bawk nen, Box Office chart pawh a 'hot' chho ve sawt hle a ni.