Covid-19-in Coachella festival a nghawng ta

Novel coronavirus (Covid-19) darh mekin entertainment khawvel a luhchilh a, zaithiam tak takin an concert/tour neih tur an ṭhulh thu an puang sup sup hnuah khawvela music festival lian ber zinga mi pawh a luhchilh ve ta.

Thla leha California-a neih tur Coachella Valley Music and Arts Festival chu Covid-19 vangin October-ah sawn hlat a ni dawn tih event organiser  Goldenvoice chuan an puang a ni.

Goldenvoice chuan an neihna tur hmuna tual­chhung hrilselna lama thuneitute chuan festival hi tikhawtlai rih mai tura an ngen thu an sawi.  Golden­voice buatsaih tho country music festval  Stage­coach pawh April-a neih tura rua­hman vek tawh chu October-ah sawn a ni bawk.

"Kan mikhualte, staff leh community hriselna leh himna hi kan ngai thutak hle a, chumi vang chuan thutlukna kan siam a ngai ta a ni," tiin thuchhuah an siamah chuan an tarlang. Kumin Coachella fes­tival hian Rage Against The Machine leh Frank Ocean-te chu headliner tur an ni a, Lana Del Rey leh Travis Scott-te pawh an perform dawn bawk. Goldenvoice hian performer turteah hian nghawng a neih dawn leh dawn loh erawh an tarlang lo a ni.

Ruahmanna hmasaah chuan April 10-12 leh April 17-19-a neih tura ni mah se sawn a ngai ta a, October 9-11 leh October 16-18-ah neih a ni dawn ta zawk a ni. Organiser-te chuan naktukah hi chuan ticket lei tawhte pawh an refund leh vek dawn tih an sawi.