Billboard : BTS leh Olivia Rodrigo, An la vul zual zel

Billboard chart hrang hrangah BTS leh Olivia Rodrigo an la che ṭha zel a, an hla hit 'Butter' leh 'Good 4 U' -te chu kar liam ta chhunga mi ngaihthlak tam ber hla a la nih chhunzawm. Album chart lamah erawh Lil Baby & Lil Durk album 'The Voice of The Heroes' chu pakhatna a ni thung.

B for BTS, B for Butter
Bangtan Boys hla hit 'Butter' chu US mipuite'n kar liam ta chhunga an hla ngaithlak nasat ber ni lehin Billboard Hot 100 chart-ah pakhatna a ni leh.

Hot 100 mai bakah Global Excl. US chart-ah pawh topper an ni. Hot 100 leh Global 200 chart pahnihte hi mi ngaihven zual a ni a, heng bakah hian Billboard Social 50 chart-ah tunah hian BTS chu pakhatna an la ni zel a, he chart-ah hian kar 210 zet pakhatna an ni tawh!

Digital Song Sales chart-ah pawh 'Butter' hi pakhatna a ni a, an tlangzarh aṭang khan he chart-ah hian pakhatna a la ni char char.

Genre hrang hrang atana Billbord-in chart an siam zawng zawng tarlan sen ni lo mah se BTS single 'Butter' hi single chart ngaih hlut zualah a chung ber emaw, a dawttu emaw talah a awm zel a ni. Global 200 chart-ah pawh pahnihna an ni a, tin, BTS hi Artist 100 chart-ah pahnihna an ni leh mek bawk.

'Butter' hi an tihchhuah aṭang khan kar thum vel a liam tawh a, YouTube-ah thlirtu maktaduai 356 chuang an awm tawh a ni.

Tleirawl duhawm Olivia a vul zual zel
Thla hmasa lawk khan a album hmasa ber a tichhuak ve chauh a, khawvel hriat khawpa a larna pawh kumin kumtir lawk kha a ni. Chuti chung chuan American tleirawl duhawm Olivia Rodrigo chu a lar belh zel a, a hla thar tihchhuah apiang a 'hit' zel.

Tunah hian Billboard Artist 100 chart-ah topper a ni mek a, a album 'Sour' chu album 200 chart-ah pahnihna a ni. Chumai a la ni lo, a hla 'Good 4 U' chu Billboard Global 200 chart thununtu a zawnin kar hnih a ni leh ta chiah a, Global Excl. US chart-ah pahnihna ni lehzelin Hot 100 chart-ah pahnihna a ni mek bawk.

He hla hi US-a an hla stream nasat ber niin, streaming song chart-a roreltu a ni mek a, he tleirawl hian UK lamah pawh tunkar tir khan an single chart top 5-a hmeichhe artist zinga hla lanpui tam ber record a siam hial bawk a ni.

Album chart-ah Lil Baby & Lil Durk
Lil Baby & Lil Durk album 'The Voice of The Heroes' chu album chart-a pakhatna a ni. He album hi June 4-a an tlangzarh kha niin track 18 lai an dah a, kar hmasa chhunga US-a album hralh kal ber a ni a, album equivalent unit 143,4k vel an hmu chhuak.

Pahnihna chu Olivia Rodrigo album 'Sour' kha a ni a, country singer lar Morgan Wallen 'Dangerous: The Double Album' chu pathumna a ni thung.