‘Knives Out 2’-ah Jessica Henwick a chang dawn, an ti leh tawh!

'Knives Out 2'-a changtur zingah Game of Thrones star Jessica Henwick hming sawi rik a ni leh tawh!

Film leh series lar tak taka chang tawh British actress Jessica Henwick hian Daniel Craig leh a ṭhiante a zawm dawn tih Deadline chuan a tarlang a, 'Knives Out 2' hi engtiang takin nge an chan dawn tih pawh hriat a chakawm tawh hle.

Kar hmasa lamah khan Outer Banks star Madelyn Cline a chang dawn tih tarlan a ni tawh bawk a, a hmaa he film-a chang tur hming tarlan tawhte chu- Dave Bautista, Kate Hudson, Leslie Odom Jr., Janelle Monae, Kathryn Hahn, leh Edward Norton-te an ni nawk hlawm.

'Knives Out 2'-ah hian Daniel Craig chu a role ngai, detective Benoit Blanc lemah a chang leh dawn a, kumin nipui chhungin Greece-ah an chang ṭan ang.

A film hmasaah pawh khan milar inlan an tam hle a, Chris Evans, Ana de Armas, Jamie Lee Curtis, Michael Shannon, Don Johnson, Toni Collette, Lakeith Stanfield, Katherine Langford, Jaeden Martell, leh Christopher Plummer-te an chang a ni.