Thiṭin thlaah BLACKPINK The Movie

Korean Girl group huhang ngah tak Blackpink chuan August thla hian an kum nga tlin lawmna ni pahfawmin film 'BLACKPINK: The Movie' an tlangzarh dawn.

Soompi-in an tarlan dan chuan hemi chungchang hi Nilaini khan YG Entertainment chuan an tichiang tawh a, ram 100 chuangah an tlangzarh dawn niin an sawi.

Blackpink hian an social media account lamah an kum nga tlin lawmna pualin project "4+1 Project" chu an fan-te tan an hlui dawn tih an tarlang fo tawh a, tuna an tichhuah tur 'BLACKPINK: The Movie' pawh hi he project zinga mi hi a ni dawn a nih hmel.

An movie tihchhuah tur hi bung hrang hrangin an ṭhen dawn niin Soompi chuan an tarlang a, chung zingah chuan 'The Room of Memory'- an hla hmasa ber an tihchhuah aṭanga kum nga liam ta chhunga an thil tawn hrang hrang tarlanna tur te bakah an interview-na, la tlangzarh ngai lohte pawh a awm dawn, an ti.

Heng bakah hian hla panga, 'The Show' leh 'In Your Area (2018)' concert-a mite pawh dahtel a ni dawn an ti lehzel a, Blink tan chuan chanchin hriat nuam tak tur a ni.

Mizo ṭhalaite zingah pawh fan ngah tak Blackpink hian August 2016 khan single pahnih awmna 'Square One' an tlangzarh a, hetah hian an hla hit tak pahnih 'Whistle' leh 'Boombayah' te chu an dah a, khawvelin a ngaihven nghal hle bawk. 'Boombayah' phei hi chuan tunkar tirah khan YouTube lamah thlirtu tluklehdingawn 1.2 a nei tling tawh nghe nghe.