Science & Environment : China-in ISS-ah mi pathum a thawn chho

China chuan niminah khan Inter-national Space Station (ISS)-ah astronaut pathum a thawn chho.

Astronaut pathum China-in ISS lama a thawm chhohte chu Nie Haisheng, Liu Boming leh Tang Hongbo-te niin anni hian thla thum chhung khawvel pawnah hun an hmang dawn a, China crew zinga space mission-a thang rei ber tur niin kum nga dawn hnua ISS-a China-in a mi lehsa a thawn chhuah leh hmasak berte an ni bawk.

China hian a astronaut-te hi Shen-zhou-12 capsule-ah Long March 2F rocket hmangin van sang lamah hian a tir chhuak a, Jiuquan satellite launch centre, Gobi thlaler aṭangin an inkap chhuak a ni.

Van boruak zirchianna kawngah hian China hi tunhnaiah an che ṭha hle a, thla ruk liam ta chhung khan Thla (Moon) aṭangin lung leh lei an lak bakah Sikeisen (Mars)-ah ke paruk nei robot an thawn lut bawk.

Astronaut pathumte hi tonne 22.5 laia rit 'Tianhe module' hman theiha ISS-a chhawp tura tirh an ni. China hian April 29 khan 'Tianhe' hi a kap chhuak tawh a, tuna a tirhchhuahte hian hman theih turin an peih fel ang.

Nie Haisheng, Liu Boming leh Tang Hongbo-te hi China-in van boruaka mihring a kah chhuah vawi sarihna an ni a, China space station siam a nih hnua an tirh chhuah hmasak ber an ni thung.