OnePlus Nord CE 5G India-ah a lei theih tawh

One Plus chuan Rs 30,000 hnuai lama 5G phone tlemte zinga mi ni turin OnePlus Nord CE 5G chu tunhnai khan a tlangzarh a, Amazon leh online dawr ṭhenkhatah pawh lei turin a awm tawh a ni.

Nikum kum laihawl velah khan One Plus hian Nord smartphone an lo tihchhuak tawh a, tuna an tihchhuah thara CE an dah tel hi 'Core Edition' tihna niin mid-range phone zingah chuan ṭha ber zinga mi tura ngaih a nih thu phone review-tute pawhin an sawi uar hle.

Variat chi thum awmin 6GB RAM, 128GB; 8GB RAM, 128GB leh 12GB RAM, 256GB-te an siam a, Rs. 22,999 aṭanga Rs. 27,999 inkar man an ni hlawm. Rawng chi thum Charcoal Ink, Blue Void leh Silver Ray-te siamin a variant azirin a rawng hi thlan tur a awm a ni.

He phone hi review tawhte chuan a tlangpuiin an fak hlawm hle a, a man ngaihtuah phei chuan a ṭha an ti viau hlawm. A camera hi low-light-ah an fak vak lo thung a, chumi tih loah chuan a man huah chuan phone ṭha ber zingah an ngai.