TITANS Season 3 ruangam hmuh tur a awm ta
DC series Titans season 3 trailer hmasa ber chu HBO Max lam chuan hmuh theih turin an chhawp chhuak ta. August 12-ah an chhuah ṭan ang.
Titans Season 3 trailer an tihchhuah chu second 59 leka thui a ni. Chuti chung chuan a hawi lam tur eng emaw chen a hriat theih. A changtu pawimawh ho chu an inlan kim leh vek dawn tih a hriat a, Joker-a'n Jason Todd (Robin) 'crowbar' hmanga a that lai niawm tak hmuh tur awm zeuh chu fan-te titi titamtu ber a ni nghal.
Red Hood a rawn lang tawh bawk a, chu chu fan-te nghahhleh ber pawh kha a ni a, DC fan-te tan chuan hei hi hmuh chakawm tawh tak tur a ni. Gotham khawpuia thil thleng angin an chang dawn tih trailer aṭangin a hmuh theih bawk.
HBO Max-ah August 12 hian episode thum an tichhuak phawt dawn a, chumi hnuah chuan kartin Ningani apiangin an tichhuak ṭhin ang.
Titans season 2 tawp dawnah khan Donna Troy kha thi mah se season 3-ah hian chang tur zingah hian Donna lema chang Conor Leslie hming a la tel a, eng ang takin nge a rawn inlan dawn tih hriat a chakawm tawh hle.
Brenton Thwaites, Anna Diop, Teagan Croft, Ryan Potter, Conor Leslie, Curran Walters, Joshua Orpin, Alan Ritchson, leh Minka Kelly-te an rawn lang leh vek dawn a ni.
Season 3 tihchhuah a ni lehnghal dawn tih hi kum 2019-a Season 2 a tawp rual khan an puang nghal a, mahse nikum lamah hri nasa taka a len avangin an chan chhunzawm hleithei loa, kumin lamah erawh tichhuak ngei turin an peihfel ta a ni.
Nikum April thlaah khan cinemato-grapher Boris Mojsovski chuan Bruce Wayne lemah Iain Glen a chang leh dawn tih a lo sawi tawh.
Season 3-ah hian hmel thar, comics lama DC fan-te'n an hmelhriat tak tak kan hmu dawn. Savannah Welch chu Barbara Gordon/Batgirl lemah a chang dawn tih tarlan lo ni tawh bawkin, Robin thar tur Tim Drake lemah Jay Lycurgo chu a chang dawn tih tarlan a ni tawh bawk.
Dr. Jonathan Crane/Scarecrow pawh Season 3-ah hi chuan kan hmu dawn a nih hmel a, Vincent Kartheiser chuan he role hi a chang dawn a, Lady Vic lemah Kimberly-Sue Murray a chang thung ang.