Billboard chart-ah Brie Larsson a lang

Captain Marvel lem hnehsawk taka changtu Brie Larsson hi mi ṭhenkhat chuan a zai thiam tih kan hre lo mai thei, mahse tunah hian Billboard Rock Digital Song Sales leh Alternative Digital Song Sales chart-ahte a lang tlat mai.

Brie Larsson hian kum 11 liam taah khan 'Scott Pilgrim' film-ah Metric band hla 'Black Sheep' tih hla a sa a, he hla hi MRC Data-in a tarlan dan chuan kar hmasa khan download aṭangin copy 2,000 lai an hralh leh avangin Rock Digital Song Sales leh Alternative Digital Song Sales chart-ahte chuan pasarihna a ni.

'Scott Pilgrim' en tawhte chuan an hre awm e, Brie Larsson chu Envy Adams lemah a chang a nih kha.

Lemchan lamah Oscar hial pawh lo dawng tawhtu Larsson hian lemchan a luhchilh tak tak hmain zai lamah hun a hmang hmasa a, a single pakhat 'She Said' phei chu Billboard Hot Single Sales chart-ah a hunlai chuan No. 31 hialte pawh a nihpui phak a ni.