Led Zeppelin hmingchawiin Uṭawk hming phuah

Scientist-te chuan Ecuadorian Andes-a uṭawk chi thar an hmuh chhuah chu British rock band Led Zeppelin hmingchawiin 'Pristimantis ledzeppelin' tiin a hming an phuah.

Pristimantis ledzeppelin hi English chuan 'Led Zeppelin's Rain Frog' tihna a ni a, scientist David Brito-Zapata leh Carolina Reyes-Puig-te hmuh chhuah niin Ecuador hmar chhak leh Peru hmar chhak lam inkara awm Cordillera del Cóndor-a an hmuh chhuah a ni.

An uṭawk chi thar hmuh chhuah chungchang hi Neotropical Biodiversity journal bakah Ecuadorian sorkar hnuaia awm Na-tional Biodiversity Institute website-ahte an tarlang a, Pristimantis genus chhungkaw zinga mi niin an tarlang.

Pristimantis genus chhungkua hi an tam hle a, chi 569 vel awmin chung zinga 28 vel chu tunhnai kum hnih chhungin Ecuador leh a chhehvela an hmuh chhuah thar a ni.

David Brito-Zapata leh Carolina Reyes-Puig-te chuan an journal-ah chuan Led Zeppelin leh an music mawi tak chawimawina atan uṭawk hming chu an phuah tih an tarlang.