Billboard : Kar hmasaa Christian chart roreltu Crowder 'Good God Almighty'

Billboard Hot Christian Songs Chart-ah kar hmasa chhung khan Crowder hla 'Good God Almighty' chu pakhatna a ni a, Lauren Daigle hla pahnih 'You Say' leh 'Hold On To Me'-te chu pahnihna leh pathumna an ni.

'Good God Almighty'
Chart-a pakhatna ni mek David Wallace Crowder-a hla, kar hmasa chhunga Billboard chart thununtu 'Good God Almighty' hi a studio album pangana June 11-a a tlangzarh tak 'Milk & Honey'-a mi a ni a, a hla hrim hrim hi chu single-in April thlaah khan a tichhuak tawh thung. Kar hmasaah khan pahnihna a ni a, chart-ah hian kar 21 chhung a lang tawh bawk.

Crowder hian US lamah chuan lawm a hlawh hle a, kum 2014-a a tlangzarh 'Neon Steeple' album phei chu RIAA Gold Certification a ni hial a, US Billboard 200 chart-ah pawh khawvel lam hla lar tak tak karah pakuana te hial a ni phak a ni.

Lauren Diagle hla a 'hit' reng
Billboard Christian chart lama che ṭha reng, record pawh eng emaw zat lo siam tawh Lauren Daigle-i hla 'You Say' leh 'Hold On To Me'-te chu pahnihna leh pathumna an ni a, 'You Say' hi kar 149 zet he chart-ah hian a lang tawh a, pakhatna te pawh a lo nihpui tawh a ni. RIAA Platinum Certification vawi li lai hmu tawh a ni nghe nghe.

'Hold On To Me' pawh hi chart-ah hian No.1-te pawh a lo ni tawh a, kar 15 chhung he chart-ah hian a lang tawh a ni.

Pathian fakna hla lar mekte chu..
TobyMac 'Help Is On The Way' chu palina a ni a, chart hmasaah pawh palina bawk a ni. for KING & COUNTRY 'Amen' chu pangana a ni thung.

Phil Wickham, MercyMe, Jordan St. Cyr leh We The Kingdom Featuring Bear Rinehart-te pawh chart top 10-a langte an ni bawk. Billboard hian Hot Christian Songs Chart-ah hian hla 50 an tarlang ṭhin a ni.