Taylor Swift-in 'Red' a tlangzarh ṭha leh dawn

A hla hlui ho record ṭha mektu Taylor Swift chuan kum 2012-a a tlangzarh 'Red' album chu a tlangzarh ṭha leh dawn a, November thlaah hi chuan tlangzarh leh hman a tum.

Fan-te'n hemi chung-changa rinthu neuh neuh an sawi hnuah Zirtawpni liam taah khan Taylor Swift chuan a studio album palina 'Red' a record ṭhat leh chu November 19-a a tlangzarh dawn thu a tarlang.

He album thar turah hian hla 30 a awm dawn a, chutah chuan fan-te'n an lo beisei ruk deuh, 'All Too Well' extended version minute 10 laia sei pawh a awm dawn.

'Red' a tlangzarh thar leh dawn thu hi Instagram lamah 'caption' thui tak siamin a puangzar a, chutah chuan 'Red' chu a music bakah a hlathu zawng zawng nen mihring rilru na 'heartbroken person' sawina atana a hman thute pawh a tarlang tel a ni.

Big Machine Label Group hnuaia a hla tihchhuah zawng zawng Scooter Braun-a'n rights a neih tak avangin American singer Swift hian a project hmasa ho chu a siam thar leh vek dawn thu a lo sawilang tawh a, hemi avang hian April thlaah pawh khan 'Fearless (Taylor's Version)' a lo tlangzarh tawh bawk.