Gaming News : MOBA game thar tur 'Pokémon Unite'

Nintendo Switch, Android leh iOS-a khelh theih turin Pokémon MOBA (multiplayer online battle arena) game thar tihchhuah a ni ṭep a, chu game hming chu Pokémon Unite tih a ni.

He game hi Pokémon khawvela official MOBA game hmasa ber tur nia tarlan niin nikum June thlaah khan siam a nih dawn thu tarlan a lo ni tawh a, tunah erawh tlangzarh hun tur pawh a hriat theih ta.

Thlaleh, July thlaah hian Nintendo Switch-a khelh theih turin an tlangzarh phawt dawn a, Android leh iOS lamah erawh September thlaah tlangzarh a ni thung ang. A game trailer pawh hmuh tur a awm tawh a, gameplay trailer pawh hmuh tur awm tawhin MOBA game ngaina, Pokémon fan ni bawkte tan chuan khelh chakawm tawh tak tur a ni.

MOBA game dang ang bawkin Pokémon Unite hi arena-a 5-on-5 team battle game a ni a, game developer-te chuan Pokémon 19 hman theih turin an chhawp chhuak phawt dawn niawm tak a ni a, mahse update awm hunah Pokémon an dah belh ṭhin dawn a nih hmel.

He game hi The Pokémon Company and Tencent Games' TiMi Studios-te siam a ni a, tlangzarh thla tur tarlang tawh mah se a ni tur tak erawh an la tarlang tel lo.