Fast & Furious 9 $um lakluh a tam tawh

Movie market lian ram pahnih US leh UK-ah la tlangzarh lo mah se Fast & Furious 9 chuan tun kar tawp liam ta thleng khan $maktaduai 292.1 lai sum a lalut der tawh.

Kar tawp liam taah khan ram 134-ah tlangzarh leh niin chung ram zingah chuan Australia, Bulgaria, Czech Republic, Indonesia, Israel, Slovakia, leh Ukraine-te pawh an tel a, heng ramah hian F9 hi che ṭha leh hlein $mtd 300 dawn sum hi a lalut ta a ni.

Sum a lakluh tamna ber tur ram nia ngaih US-ah chuan Zirtawpni lo awm turah hian an tlangzarh dawn chauh a, chumi hunah chuan a sum lakluh pawh a pung nasa viau tura ngaih niin, India ramah erawh engtikah nge an tlangzarh dawn hriat theih a la ni lo.

Kar tawp liam taah khan Austrailia-ah chuan $mtd 6.63 lai sum a lalut a, Indonesia-ah $mtd 3.6 lalutin Israel-ah $mtd 1.5 a lalut thung a, New Zealand aṭangin $mtd 1.4 vel a lalut bawk a ni.

F9 siamna atan hian $mtd 200 vel an seng nia chhut a ni a, hripui leng lo phei se chu an budget hi chu an khum hneh rem rem dawn hle tih a chiang hle. US-a an la tlangzarh lo chung pawh hian kumin chhunga film sum lalut tam palina a ni der tawh.

Fast & Furious franchise-ah hian film 10 a awm tawh a, a main saga film pakua bakah spin-off film Fast & Furious Presents: Hobbs & Shaw chu tihchhuah tawh a ni. Khawvela film series sum lalut tam pasarihna a ni mek a, a film series zawng zawng sum lakluh tawh zat belhkhawm chu $tluklehdingawn 6 vel zet a ni a, chuti chung chuan tunah hian a franchise film pahnih thum tal chu siam belh an la tum hmel hle bawk.