Box Office : 'The Hitman's Wife's Bodyguard' hralh a kal ber

'The Hitman's Wife's Bodyguard' chu kar liam ta khan tlangzarh a ni ta a, kar tawp liam ta chhung khan Box Office-a sum lalut tam ber a ni nghal.

Hmahruaitu 'The Hitman's Wife's Bodyguard'
Kar hmasa Nilainia tlangzarh 'The Hitman's Wife's Bodyguard' chu beisei lawk ang ngeiin a che ṭha a, kar tawp liam taah khan theatre 3,331-ah pek chhuah niin North America Box Office-a sum lalut tam ber a ni nghal a, $16,747,160 lai a lalut.

Kum 2017-a tlangzarh action comedy film 'The Hitman's Bodyguard' chhunzawmna 'The Hitman's Wife's Bodyguard' hi a changtute en ringawt pawhin lawm a hlawh dawn tih a hriat sa. A film hmasaa kan hmuh tawh Ryan Reynolds, Samuel L. Jackson leh Salma Hayek-te an inlan leh a, anni ringawt pawh hi en chakna tham a nih tawh mahnak alaiin Antonio Banderas leh Morgan Freeman te an rawn inlan leh bawk a, hit lo thei a ni lo.

Box Office-ah rorelin 'A Quiet Place Part II' te ai pawha dinhmun sang zawkah ding mah se film critics lam mit erawh a tlung vak lo a, rating pawh an pe ṭha vak duh hlawm lo. Rotten Tomatoes-ah phei chuan raing 4.4/10 chiah a hmu a, review-tu mi 130-te beisei a pha vak lo a nih hmel. Hetihlai hian hmuhnawm tia faktu pawh an awm ve nual tho.

Film, sum lalut tam zual dangte chu
'A Quiet Place Part II' chu pahnihna a ni a, $9,086,739 lai sum a lalut leh. He film hian North America aṭang ringawtin $124,945,917 lai sum a lalut tawh a, ram dang aṭanga a sum lakluhte nena belhkhawm phei chuan 21,645,917 zet a lalut tawh.

'Peter Rabbit 2: The Runaway' chu pathumna niin $6,081,764 a lalut a, 'The Conjuring: The Devil Made Me Do It' chu palina a ni a, 'Cruella' chu kar hmasaa a dinhmun ngai, pangana bawk a ni leh.

'Godzilla vs. Kong' sum lakluh a tam tawh
Box Office chart-a 13-na ni pha ṭawk tawh 'Godzilla vs. Kong' chuan kar tawp liam ta chhung khan $240,003 sum a lalut a, hei nen hian North America Box Office aṭangin $100,102,879 sum a lalut tling chiah. Hripui len hnua North America Box Office aṭanga $mtd 100 lalut thei film pahnihna ani chiah a, ram hrang hrang aṭanga a sum lakluh nena belhkhawm erawh chuan $442,502,879 lai sum a lalut hem hem tawh mai a ni.

Tuna pahnihna ni mek 'A Quiet Place Part II' hi hrilen hnua North America Box Office aṭanga $mtd 100 sum lalut tling thei hmasa ber a ni a, 'Godzilla vs. Kong'-in tualchhunga thla thum vel chhunga a sum lakluh zat chu kar thum chhung vel lekin 'A Quiet Place Part II' hian a lalut thei a ni.