Science & Environment: Mizoramah fanghmir chi thar pahnih hmu chhuak

Bengaluru-a hmunpui nei Ashoka Trust for Research in Ecology and the Environment (ATREE)-te chuan Mizoramah fanghmir chi thar pahnih an hmu chhuak niin thuchhuah an siamah an tarlang.

An fanghmir chi thar hmuh chhuah hi fanghmir chi vang tak Myrmecina chhungkaw zinga mi a ni tih an tarlang a, Mizorama chi thar pahnih an hmuh chhuah leh tak avang hian India ramah Myrmecina chi pasarih a awm ta a ni. Mizorama Myrmecina hmuh chhuah hmasak ber a ni thung.

Myrmecina fanghmirte hi hmuh tur an tam lo hle niin an tarlang a, lung hnuaiah emaw thing mawih tawhah emaw an awm tlangpui ṭhin nia tarlangin, tun thleng hian chi 51 hmuh chhuah tawh a ni a, North America, Europe, northern Africa, India, Korea, Japan leh Australia-ahte an awm tlangpui a ni.

Fanghmir an hmuh chhuah thar pakhat hi ATREE founding president bakah ecologist leh conservation biologist ni bawk professor Kamaljit S Bawa hmingchawiin 'Myrmecina bawai' tiin a hming an phuah a, pakhat zawk chu 'Myrmecina reticulata' an ti thung.

Thuchhuah siama an tarlan dan chuan heng fanghmirte hi Mamit District-a 'Dampa tiger reserve'-ah an hmu chhuak a ni.