Madison Square Garden a bengchheng leh tawh

Kan ram lamah chuan hripui kai thar nitinin tam tak tak la hmu chhuak reng mah se khawthlang ram ropui America lamah erawh Pathianni zanah khan arena khatin concert an nei leh der tawh!

Covid-19 hripui lengin a nghawng nat ber zinga mi USA-a awm, khawvela arena lar ber zinga mi Madison Square Garden-ah chuan Pathianni zan khan Nirvana drummer Dave Grohl band Foo Fighters-in concert an nei a, hripui len hma ang mai khan arena khat tlatlin mipui an pungkhawm a, thawm a ṭha hle.

Dave Grohl chuan an hla hit 'Times Like These' hmangin an show chu an hawng a, mipui pawhin an lawm kher mai.

Nikum March thlaa khawvel ram hrang hrang an in lockdown hnuah khan he arena hmingthangah hian 'full-capacity concert' buatsaih a la ni leh lo a, Pathianni zanah erawh kha chuan a leng zat zat an inhnawh leh hmiah tawh mai a ni. Foo Fighters hi darkar thum dawn an concert-a, thla 15 vel lai 'live music concert' chhim tur awm ta lo chu, mipui pawhin an lo nghakhlel hle a ni ang, arena-a leng zat mi 18,000 chu Foo Fighters hian an ṭhap dual dual a ni ber mai.

He concert chhim turte hian Covid-19 vaccine an la ngei a ni tih finfiahna an neih a ngai thung. Foo Fighters hian hla 24 lai an sa a ni.