Khawthlang zaithiamte dan zawh loh Khawchhak tlangval rual BTS

Billboard Hot 100 chart-ah Korean supergroup BTS chuan an hla hit 'Butter' chu a zawnin kar li chhung pakhatna an nihpui ta. Album chart lamah erawh Polo G chuan a album thar 'Hall of Fame' hmangin ro a rel thung a, Billboard chart hrang hrang thlir erawh chuan American tleirawl Olivia Rodrigo bawk a la ropui.

BTS Butter a tuiral thei lo
Rimawi khawvela khawchhak lungpui lian BTS chuan an hla hit 'Butter' chu an la larpui rem rem hle a, Hot 100 chart-ah a zawnin kar li chhung pakhatna an ni ta. Asia mite zingah hetiang zata rei a zawna Hot 100 chart topper ni thei hi an la awm ngai lo a, BTS hi a hmasa ber an ni.

Kar hmasa chhung khan (June 17 thleng) 'Butter' hi US-ah ringawt vawi maktaduai 12.5 stream a ni a, download aṭangin 1,11,400 lai hralh a ni bawk. Pathianni thleng khan radio kaltlangin mi mtd 25.8 velin an ngaithla anga chhut a ni.

'Butter' hi tunah hian Digital Song Sales chart topper a ni mek bawk. Spotify lamah pawh ni khata hla stream tam ber record te pawh lo siam tawhin an tihchhuah ni khan khawvel ram hrang hrang aṭangin ni khatah vawi mtd 20.9 zet an stream. YouTube-ah pawh record pahnih, khum har tak tur- darkar 24 chhunga vawi mtd 108.2 thlir hlawh chhuak hman hmasa ber record leh premiere ruala thlirtu mtd 3.9 lai awm thei record an siam tawh bawk.

US leh khawvel ram hrang hrangah ARMY an lian zel a, chumi avang chuan tunah hian Billboard Global Excl. US chart-ah pawh topper an ni mek. Artist 100 chart lamah erawh Olivia Rodrigo an tluk pha lo deuh a, pahnihna an ni.

Olivia Rodrigo tel loin Billboard news a kim hleithei lo
'Driver License' hitmaker Olivia Rodrigo chu tunah hian Artist 100 chart-ah topper a ni leh mek a, a hla 'Good 4 U' pawh a hit chhunzawm zel.

'Good 4 U' hi tunah hian Hot 100 chart-ah 'Butter' thachhangdawltu chiah a ni a, Hot 100 chart lamah hi chuan 'Butter' hi a tluk hleithei lo. Global 200 chart lamah erawh 'Butter'-in a tluk pha lo deuh thung a, topper a ni mek a, Billboard Global Excl. US chart-ah pahnihna a ni bawk.

Olivia Rodrigo album 'Sour' chu tunah hian Billboard 200 chart-ah pathumna a ni mek thung a ni.

Billboard 200 chart lam ve thung
Polo G studio album pathumna 'Hall of Fame' chu tunah hian Billboard 200 chart-ah pakhatna a ni mek a, kar khat chhung album-equivalent unit 1,43,000 a hmu chhuak hman. American rapper Polo G hian 'Hall of Fame' hi Billboard 200 chart topper album a neih hmasak ber a ni.

Migos album 'Culture III' chu pahnihna a ni thung a, Olivia Rodrigo album 'Sour' chu pathumna a ni ve leh bawk.