McAfee company dintu John McAfee a thi

Anti-virus software entrepreneur McAfee dintu John McAfee chu Nilaini khan Barcelona tan-ina a tanna cell-ah thi a hmuh a ni.

John McAfee hi Spanish court-in chhiah pek chungchanga a thubuai hmachhawn tura US hnena hlan kir leh a remtih hnuah a tanna hmunah hian thiin an hmu a, kum 75 lai ni tawhin mahni intihlum a nih thu Catalan Justice Department chuan thuchhuah an siamah an tarlang.

Catalan Justice Department chuan tan-ina medic awmte chuan theihtawp chhuah mah se an chhan thei tawh lo tih an sawi.

Commercial anti-virus software hmasa ber siam chhuaktu McAfee company dintu John hi October, 2020 khan Turkey pana thlawhtheihnaa a chuang tur Spain-ah man a ni a, kum li chhung lai chhiah awlrua puh a nih avangin an man a ni. Kum 2014-18 inkar khan pawisa tam tham tak thawk chhuah mah se income tax return a file duh lo niin an tarlang.

Nilaini zingah khan Spain National Court chuan US lama a thubuai ngaihtuah tura thawn turin thupek a tichhuak a ni.

McAfee hian thla tir lamah khan amah an puhna chu politics thila inpuh hmingchhiatna a nih thu sawiin US-ah thawn kir a nih chuan a dam chhung an tantir dawn thu a sawi a, a ukil Nishay Sanan pawhin an puhna zawng zawng chu beih let vek a tum thu a sawi ve bawk.

Entreprenuer lar McAfee hi kum 1945 khan England-a Cinderford-ah piangin Salem, Virginia, US-ah a seilian thung a ni. Kum 1967 khan Roanoke College aṭangin Mathematics-ah bachelor degree a hmu a, McAfee a din hma hian New York-a NASA Institute for Space Studies-ah programmer te pawh a ni ṭhin.

Kum 1987 khan computer anti-virus company McAfee Associates chu dinin tunah erawh McAfee company hi Intel hnuaiah a awm tawh thung.