Britney Spears tan Justin Timberlake, Rose McGowan an ṭawng chhuak

A 'conservatorship' chung-changa rei tak chhung buai tawh Britney Spears chuan Nilaini khan telephone kaltlangin Los Angeles courtroom-a hearing an neihnaah a duhzawng leh a harsatnate a sawi chhuak a, chumi hnuah chuan social media lamah amah thlawptu milar tak tak an rawn inlar nasa hle. Chung zingah chuan a chhas hlui Justin Timberlake bakah Rose McGowan leh Mariah Carey-te pawh an tel.

Tunhnaiah social media lamah 'Free Britney' campaign a lar hle a, Britney hian thlawptu pawh a nei ngah tawh hle a ni.

Princess of Pop ti hialte pawha an lo sawi tawh ṭhin Britney chuan court hnenah chuan,"Ka chhungte hi diktak chuan khin theih ka duh a ni," tiin a sawi chhuak hial a, "Khawvel hmaah ka ṭha tih ka sawi khan, dawt ka sawi a ni. Ka hlim lo a, ka mu thei loa, ka depress a, nitin hian ka ṭap a ni.

"Heng zawng zawng hi tihtawp ka duh. Ka nun kha ka nei let leh duh a ni. He 'conservatorship' hi ennawn tawh loa tihtawp ka duh a ni. 'Conservatorship' titawp tur hian petition dil ka duh," tiin a sawi a, lainat pawh a hlawh hle.

Britney 'conservatorship' hi tunah hian a pa Jamie Spears kutah a awm mek a ni.

'Toxic' hitmaker thlawp zawnga ṭawng chhuak zingah hian Halsey pawh a tel a, a bialpa hlui Timberlake chuan,"Vawiina kan thil hmuh aṭang khan Britney hi kan thlawp vek tur a ni.

"Kan hun kal tawh, a ṭha emaw a chhia emaw, eng anga rei tawh pawh ni se, a (Britney) chunga thil thleng hi chu thil dik a ni thei lo.

"Ama taksa ngei chunga a thutlukna siam turah tu hmeichhia mah khuahkhirh an ni ngai tur a ni lo," tiin Twitter-ah a sawi.