George Floyd thihna avangin mi larte an ṭawng chhuak

African-American George Floyd thihna leh chi inthliar duh lohna lantirna US bakah khawvel hmun hrang hrangah lantir a ni a, khawthlang milarte chuan hei hi an theihtawpa thlawpin social media lama an auchhuah mai piah lamah milar eng emaw zat chu kawngzawhnaahte pawh an tel ve hial.

May 25, Thawhṭanni khan Minneapolis-a dawr pakhat hnen aṭangin police-te chuan phone call dawngin black American kum 46 mi, George Floyd hian $20 lem a pe niin an sawi a, officer mantu chuan a khupin leiah a nghawng nawr betin Floyd hian a thawk theih loh thu leh that lo turin a ngen a, hemi video hi a darh zui a, hemi vang hian US-ah hian 'racism' duh lohna lantirna nasa tak a chhuah phah.

Preliminary autopsy aṭanga a lan dan chuan police officer hian Floyd hi a khup hian leiah hian minute 8 leh second 46 a nawr bet a, minute thum chu nikhua a hre tawh lo hial niin medical examiner-te chuan an sawi. 

A khup a laksawn hma minute hnih velah officer dangte chuan a banah a mar phu a awm leh awm loh an check a, a la awm avangin damdawi-in an panpui nghal a, mahse darkar khat hnuah a thih thu puan a ni ta a ni.

US president Donald Trump-a'n George Floyd thihna leh chi inthliarna duh lote chu 'Thugs' tiin a ko a, a ṭul a nih chuan sipai chakna hmanga duh lohna lantira pungkhawmte chu hnawh darhah a vau hial a ni. Hei hi mi larte chuan an haw hle a, Billie Eilish, Tarlor Swift, Amy Lee, Axl Rose leh milar dang eng emaw zat chuan nasa taka sawi selin Taylor Swift leh Pink phei chuan November-ah an vote dawn loh thute an sawi nghe nghe.

Duh lohna lantirna kawng­­zawha milar tel zingah hian Ariana Grande leh Halsey-te pawh an tel a, Halsey phei chu 'rubber bullet'-in vawi hnih an kap fuh hial a ni. 

Hmun ṭhenkhatah chuan buaina a chhuak nasa hle a, tharum thawh loa kawng­­zawhna hmun tam tak awm ve bawk mah se khawpui eng emaw zatah chuan kawngzawhte hian buaina an siam nasa hle a, motor-te halin dawrte pawh an rawk a, an bungrua te pawh an tichhe nasa hle bawk.

Nimin kha chi inthliarna duh lohna lantirna 'Black Out Tuesday'-ah duh lohna lantirte hian an puang a, hei hi streaming service leh recording label eng emaw zat chuan an zawm. Heng zingah hian record label lian tak tak Warner Records, Universal, Sony, Interscope Geffen leh Columbia-te pawh telin hna an thawk lo a, midang biak pawh theih loin an awm bawk a ni.