Phil Wickham 'Hymn of Heaven' album a chhuak ta

American Christian singer Philip David Wickham chuan Zirtawpni khan a album thar 'Hymns of Heaven' chu a tlangzarh ta.

'This is Amazing Grace' hitmaker Phil Wickham album thar 'Hymns of Heaven' hi a studio album pariatna ni tawhin kum 2019-a Krismas album a tlangzarh hnua a album tlangzarh leh hmasak ber a ni a, streaming platform hrang hrangah a album thar hi a stream theih tawh.

Hla 13 awmna album niin album nikum September-a single-a a tihchhuah hla ṭha tak 'Battle Belongs' leh kumin April-a a tihchhuah 'House of the Lord' te pawh kha he album-ah hian a dah. 'Battle Belongs' phei chu Billboard Christian Airplay chart topper-te hial pawh a lo nihpui tawh kha a ni.

Wickham hian Zirtawpni khan a album title hla 'Hymn of Heaven' music video pawh a tlangzarh nghal bawk a, mahse India ramah erawh YouTube kaltlang chuan he video hi en theihin nimin thleng kha chuan a la awm lo. A album thara hla awmte hi ṭhalaite rilrem zawng tak hla a ni leh hlawm a, Mizo ṭawnga lehlin tlak tak tak pawh a awm leh dawn tih a chiang.

Album thar tihchhuah chungchanga thuchhuah a siamah," Hymns of Heaven hi Pathian fakna leh lawmthu hrilhna hla dahkhawmna a ni." tia sawiin,"Miin Pathian awmpuina an chan theihna hun awlsam zawka siam hi ka thil tih duh ber a ni." a ti

Kum 37 mi Phil Wickham hian a album thara hlate phuahpui tur hian mi hrang hrang a thawhpui a, chung zingah chuan Jonathan Smith, Jason Ingram, Ethan Hulse, Brian Johnson, Ricky leh Ran Jackson-te pawh an tel a, anni bakah hian Passion City member Sean Curran, Hillsong Chris Davenport, Bethel Music Kalley Heiligenthal, leh Brandon Lake-te pawh an tel a ni. Brandon Lake phei hi chuan 'Where I'm Standing Now'-ah a zaipui nghe nghe.

Khawvel huap pawha Gospel singer lar ber pawl Wickham hian kum 2019 khan a hla hit 'Living Hope' chu GMA Dove Awards-ah 'Worship Recorded Song of the Year' a lo dawnpui tawh a, 'This Is Amazing Grace' kha RIAA-in Platinum Certify-ah an puang hial pawh a ni.