F9 star Nathalie Emmanuel-i'n Lirthei khalh phalna nei lo!

'Game Of Thrones' actress, Fast and Furious star ni bawk Nathalie Emmanuel chuan driving license a la neih loh thu a sawi chhuak mauh mai!

British lemchan thiam Nathalie Emmanuel hi lirthei chak tak taka tlanpui a nihna film Fast and Furious film pathum laiah chang tawh mah se a tak takah lirthei a lo la khalh thei hauh lo. Essence-in an kawmnaah hemi chungchang hi sawi chhuakin,"License ka la nei ngai reng reng lo. A nuihzathlak zawk a ni, a chhan chu lirthei ka khalh ngai lo bawk a," a ti.

"Kum 17 mi vel kan nih lai aṭang tawh khan lirthei khalh chu ka zir tawh a, mahse lemchan ka luhchilh ta sia, ka buai zui ta em a ni, Ka buai a nih loh pawhin ka 'broke'- chu chu lemchan thiam nun a ni. A ni tak tak! Tunhnai lawk khan lirthei khalh zir turin hun leh pawisa ka nei ve chiah a, a chhan chu a hautak a ni. England-ah hian lirthei khalh zir a hautak hle a ni," tiin a sawi.

Emmanuel hi kum 2015 khan 'Furious 7'-ah Megan Ramsey lema changin a inlan ṭan a, kum 2017-a 'The Fate of the Furious' tlangzarh a nih khan chan chhunzawm lehin tuna film hit mek F9-ah pawh hian a inlan leh bawk a ni.