Mystical Mizoram Ṭhazual Gospel : Amtea & Zorinsanga Sailo 'Ka Beiseina Isua' a mawi ber

Mystical Mizoram Ṭhazual Gospel chart-ah roreltu thar an awm a, chu chu tudang ni loin Mizo Gospel singer Mipa zinga huhang ngah ber pawl pahnih Amtea leh Zorinsanga te ṭhian dun niin, an thawhdunna hla 'Ka Beiseina Isua' chu tuma tluk rual loin chart topper a ni.

'Ka Beiseina Isua' a mawi ber
Amtea leh Zorinsanga Sailo te hian March thla tirah khan Amtea hla lehin 'Ka Beiseina Isua' hi an tichhuak a, an zai thiam dunin an hla a mawi bawk a, rei loteah chart-ah pawh an rawn inlan vat a ni.

He hla hian hma a sawn chak hle a, thla thum vel a liam meuh chuan chart topper an rawn ni ta der mai.

Chart hmasaah khan palina aṭangin pahnihnaah an rawn inhlangkai dawrh a, hma an sawn chak dan thlir letin pakhatna an nih thuai hi a rinawm a, tunkar chart-ah chuan pakhatna an rawn ni ta a ni. He hla hi MDM YouTube channel-ah an dah a, a hla a mawi piah lamah an sa thiam dun bawk a, chart topper nih pawh hi an phu viau.

Pahnihna Andrew K. Lalchhandama
Andrew K. Lalchhandama' chuan a hla 'Beiseina Eng' chu pahnihnaah a rawn inhlankaipui ta a, chart lehah Amtea leh Zorina te hi a nek chhuak thei dawn em tih hriat a chakawm tawh hle. March thla tawpa a tihchhuah chauh kha ni mah se a dinhmun a ṭha sawt hle a, chart-a hmasawn chak ber pawl pawh a ni.

OiC, Remruata leh Thlengi
Mizo Gospel group lar ber pawl One In Christ chuan an hla 'Kan Pathian Ropui' chu pathumna an nihpui a, C. Lalremruata 'Sulam Lenmawi' chu palina niin chart-a che ṭha ṭhin tak Lalthlengliani Jongte chuan 'Malsawmna ka beisei leh si' hmangin Top 5 a khar a ni.

Chart top 10-ah hian Sawmtea, Seraphic Choir, Ruth Malsawmtluangi, Mawipuii ft Madini & Nubawihi bakah The Prophets-te pawh an lang.