Courtney Love Vs Olivia Rodrigo

Rimmawi khawvela huhang ngah ber pawl ni mek, American tleirawl kum 18 mi Olivia Rodrigo chuan ni nga liam taah khan Instagram lamah vawiina a concert film tihchhuah tur 'SOUR prom' tihlarna turin a thlalak a tarlang a, chu a thlalak danah chuan fam ta Kurt Cobain-a nupui kum 56 mi Courtney Love a lawm vak lo niin a lang.

Olivia Rodrigo thlalak dan hi kum 1994-a Courtney Love band 'Hole' album cover art nen a inang hle a, chumi avang chuan Love chuan Rodrigo lak aṭangin ngaihdam dilna a phut mauh mai.

Courtney Love chuan Instagram lamah 'Deja Vu' hitmaker thlalak chu tarlangin "Spot the difference! #twinning! @oliviarodrigo" tiin caption a siam a ni.

Rodrigo pawhin Love post siam hi, "Love u and live through this sooooo much", tiin a comment nghal vat a, chhanletna a dawn erawh a beisei loh lam a nih daih mai thei a ni.

"Olivia- keipawh le. Ka pangpar dawr ngainat ber chu Notting Hill, London-ah a awm! I hriatchian duh chuan min lo dm mai dawn nia! I thuziak nen ka lo ngaichang reng a," tiin a chhang let ta zek a ni. Love hian ngaihdam dilna thuziak leh pangpar a phut viau a nih hmel.

Courtney a lungawi hleithei lo a niang. Facebook lamah pawh,"Pangpar leh thuziak ka nghah thu ka hrilh tawh. Thuziak pawh sei tak a nih ka beisei. Disney hian naupang hi ziak leh chhiar an zirtir lo em ni?," tiin a ang zui leh bawk.

Social media lama comment chhiar erawh chuan Olivia Rodrigo chuan thlavang hauhtu a ngah hle thung a ni.