Box Office: F9-in US a tlan lut ta : A tlan chak lutuk, tlan pelh chi a ni lo!

F9 chu US-ah tlangzarh a ni ta a, hrilen hnua film sum lalut tam ber a ni nghal!

Box Office-ah beisei lawk ang ngeiin 'F9' chuan sum a lalut tam ber a, 'A Quiet Place Part II' chu pahnihna niin 'The Hitman's Wife's Bodyguard' chu pathumna a ni.

F9-in record a siam
'F9: The Fast Saga' chu ram hrang hrangah a chet ṭhat viau hnuah Zirtawpni liam ta khan US-ah tlangzarh a ni ve ta a, ni thum chhungin theatre 4,179 aṭangin $70,000,000 a lalut a, hei hi hrilen hnuah chuan record a ni. Tlangzarh kara film, sum lalut tam ber record a siam.

A changtute an ṭha rem rem bawk a, action film franchise hlawhtling sa a ni bawk nen, hrileng karah pawh a sum lakluh hi a tam turu hle a ni. Vin Diesel, Michelle Rodriguez, Tyrese Gibson, Chris "Ludacris" Bridges, John Cena, Jordana Brewster, Nathalie Emmanuel, Sung Kang, Michael Rooker, Helen Mirren, Kurt Russell, leh Charlize Theron-te channa hian kar tawp liam taa Box Office-a sum che vel zawng zawng aṭanga 71% vel zet chu a pumbilh.

Hrileng kara tlangzarh mah ni se 'Fast and Furious' spinoff 'Fast & Furious Presents: Hobbs & Shaw' aiin tlangzarh kara a sum lakluh a tam zawk hial!

North America Box Office pawn lamah $334,852,000 lai lalut tawh bawkin khawvel pum huap Box Office aṭanga a sum lakluh tawh zat chu $404,852,000 lai a tling tawh.

$mtd 200 vel senga an siam hi rinlawk ang ngeiin a hlawhtling a ni.

Kawng sialtu a ni thei dawn em?
F9 hi theatre 4,179 laiah an tichhuak ngam a, hrilen hnu aṭang kha chuan theatre sangli chuanga film chhuah hi an la nei meuh lo. Khawthlang ram lamah hrileng a ziaawm bawk a, film industry pawhin ngai a awm chho leh niin a ngaih theih a, Box Office-a sum chevel pawh a tam chhoh zel mi tam tak chuan an ring.

'A Quiet Place Part II' a ngawi hle hle thei lo
'A Quiet Place Part II' chuan $6,200,000 lai sum lalut lehin kar hmasa lama pakhatna 'The Hitman's Wife's Bodyguard' aiin sum a lalut tam zawk. 'A Quiet Place Part II' hian khawvel pumah $248,488,366 lai a lalut tawh.

Pathumna 'The Hitman's Wife's Bodyguard' chuan $4,875,000 lalut lehin ram dangah he film hi tlangzarh a la ni meuh lo a, chuti chung chuan $31,419,803 lai sum a lalut tawh a ni.

'Peter Rabbit 2: The Runaway' chu sum lalut tam palina a ni a, 'Cruella' chu kar hmasaa a dinhmun ngai, pangana bawk a ni leh.